Sigrún Aðalheiður

halló

2007-04-22T04:55:00.000-07:00

halló, við erum ennþá hérna. Mamma mín er búin að vera eitthvað löt við að skrifa hjá mér. Ég hef auðvitað stækkað helling og er orðin svakalega dugleg að gera allt sjálf. Mömmu og pabba finnst ég bara hafa stækkað alveg ótrúlega á nokkrum mánuðum núna. Í haust var ég lítið barn en núna er ég bara orðin fullorðin!

Gestabókin okkar er í lamasessi, við þurfum að sjá hvort við getum ekki gert eitthvað í því við tækifæri.

Ég er alltaf í leikskólanum á virkum dögum, núna er ég farin að vera til klukkan þrjú á daginn. Mér finnst æðislega gaman í leikskólanum og vill alltaf fara þangað á morgnanna.

kv, Sigrún Aðalheiður

Ég er tveggja ára

2006-11-17T13:01:00.000-08:00

Ég er orðin tveggja ára, það eru myndir frá afmælinu mínu og hornferðinni síðari í albúmi á barnalandssíðunni minni. Það er orðið svo ofsalega mikið vesen að setja myndir inn á myndasíðuna mína, bæði með íslensku stafina og svo er þetta mjög tímafrekt svo mamma hefur skellt nokkrum myndum inn á albúmið á barnalandssíðunni, til að komast þangað fer maður í gestabókina og ýtir þar á albúm, til að komast svo aftur á síðuna mína ýtir maður á forsíða.

Annars er ég bara alltaf jafn dugleg, og dálítið hrekkjótt líka. Ég tilkynni fólki hiklaust að ég sé hrekjudollan hans pabba.
Ég er búin að fara nokkrum sinnum úr olnbogalið á vinstri (apríl, júlí, og tvisvar í okt) svo í dag (17. nóv) fór ég úr lið á hægri svo nú má bara ekkert leiða mig, mamma er að hugsa um að útbúa beisli eða einhverja græju til að það þurfi ekki að halda í hendurnar ef ég er í göngutúr.
Mér finnst mjög gaman að fara í göngutúr og líka að leika úti í garði, það finnst mér skemmtilegast af öllu. Mér finnst líka gaman að lesa bækur, púsla og elda mat í eldhúsinu sem pabbi smíðaði handa mér.
Ég er farin að syngja mörg lög og finnst gaman að syngja og spila.

kv, Sigrún Aðalheiður

Leikskólastelpa

2006-09-07T10:46:00.000-07:00

Halló halló

Ótrúlega er tíminn fljótur að líða, bara strax aftur kominn næstum mánuður!

Við erum búin að fara að Horni aftur og það var ekki leiðinlegra en í fyrra skiptið, við sáum hvali og seli og rebbi kom að þakka fyrir grautinn. Mamma ætlar að reyna að setja inn myndir frá ferðinni fljótlega.

Ég er byrjuð í leikskóla, hann heitir Sólborg, deildin mín heitir Dokka og hópurinn minn heitir Snúllurnar. Mér finnst mjög gaman í leikskólanum, ég vil samt ekki fara þangað á morgnanna en ég vil heldur ekki koma heim seinnipartinn. Ég er dugleg að borða þar og leggja mig inni og allt.

Nú er alveg að koma að afmæli og það er orðinn mikill spenningur í Aðalstrætinu, ég hlakka svo til að halda veislu.

kv, Sigrún Aðalheiður

11. maí til 11. ágúst

2006-08-11T14:25:00.000-07:00

Já er ekki kominn tími á nýjan pistil...

Mamma er búin að vera ferlega léleg undanfarna MÁNUÐI. Það hefur samt ýmislegt drifið á daga mína, ég er til dæmis búin að fara til ''Afríku'' sem er Hornvík og var þar í viku með mömmu og pabba og afa og ömmu og fleirum, það var alveg frábært.

Við mamma erum búnar að vera í fríi saman í sumar og höfum skemmt okkur vel, eina viku var Sunna Maríanna hjá okkur á daginn og svo er Arnar Ebenezer búinn að vera hjá okkur í fjórar vikur, mér finnst voða gaman að hafa krakkana í heimsókn en er samt dálítið dugleg að segja ''égáetta'' mömmu finnst það samt vera að minnka.

Stundum heldur mamma að hún eigi óþekkasta barnið í heiminum, til dæmis þegar ég mokaði úr hillunum í samkaup skríkjandi og hljóp öskrandi í burtu þegar mamma nálgaðist. Líka þegar ég segi: stríða mömmu? pissa á gólfið, pissa svo og skellihlæ. Líka þegar ég er úti að leika í garðinum og kem til mömmu og segi: hlaupa á götuna? mamma segir nei, Sigrún það má ekki, og ég hleyp af stað. Líka þegar ég kem til hennar með litina mína og sýni henni að ég sé að borða þá, sama geri ég reyndar við sandinn úti í garði.

Pabbi og mamma og Erik og Lísbet voru að gera garðinn okkar rosalega fínan um síðustu helgi og nú er komin girðing og gras og allt, alveg frábært fyrir okkur krakkana :)

Við fjölskyldan erum að fara aftur að Horni núna á næsta sunnudag og svo byrja ég á leikskóla þegar við komum heim, ég er orðin alveg rosalega spennt og get varla beðið eftir að byrja.

kv, Sigrún Aðalheiður

athugasemdir

2006-05-11T03:41:00.000-07:00

við mamma ákváðum að prófa að setja svona ''comment'' á síðuna, sjáum hvernig þetta virkar og kemur út, ef við erum ánægð með þetta þá höldum við þessu áfram. Mamma kann ekki alveg nógu vel á þetta þannig að hún kann ekki að stækka stafina neðst, sem koma alltaf undir hverja einustu færslu, við ætlum að hafa samband við vefstjórann og biðja hann að hjálpa okkur en þangað til er hægt að skrifa comment með því að ýta á endann á línunni (stöfunum) sem er fyrir neðan hverja færslu.

líka búið að setja nýjar myndir.

kv, Sigrún Aðalheiður

smá fréttir af mér

2006-05-11T02:39:00.000-07:00

Nú er sko gaman!

Það er búið að vera svo gott veður undanfarið að ég er bara alltaf úti! úti allan daginn hjá Dóru og svo bara úti í garði eða í göngutúr með mömmu þegar ég kem heim, ég fer meira að segja stundum út eftir kvöldmat þegar veðrið er mjög gott! Mér finnst skemmtilegast að vera bara úti.

Ég, mamma, Sara, Hörður og mamma þeirra fórum í sumarbústaðinn okkar á sunnudaginn, okkur fannst rosalega gaman að leika þar, það er svo mikið pláss þar, svo var líka ennþá smá snjór. Við pissuðum í koppinn úti á palli og mömmurnar skvettu í ána, það fannst okkur gaman.

Að lokum koma svo tvær skemmtilegar pissusögur af mér...
Einu sinni var ég heima hjá ömmu og afa með mömmu og pabba og Kristín frænka var líka og Bæring frændi, þau voru öll að borða en ég var sko löööööngu búin svo ég var bara farin að leika mér. Þau voru greinilega eitthvað lítið að fylgjast með mér, hvað þá hlusta á mig, svo í eitt skiptið sem þau litu á mig þá sat ég á koppnum og sagði: veeei eins og ég segi alltaf þegar ég er búin að pissa, nema ég var ennþá í buxunum.... og búin að pissa í gegnum þær ofan í koppinn!

Annað skipti var ég niðri í kjallara með pabba, við vorum að smíða hurð og skrúfa voða mikið sem mér finnst mjög gaman, svo kveikti pabbi á vélsöginni og heyrði í gegnum hávaðann öskur í mér og slökkti, þá leit ég niður á mig og sagði: gúgga. Ég var sem sagt búin að pissa á mig af hræðslu!

hver veit nema það komi nýjar myndir bráðlega...

kv, Sigrún Aðalheiður

Hætt með bleyju

2006-04-24T06:15:00.000-07:00

já, svona er lífið, mamma og pabbi nýkomin heim af fæðingardeilinni með mig pínkulitla og ósjálfbjarga og nú er ég hætt með bleyju!

Ég er búin að vera svo dugleg, það koma sárasjaldan slys, ég er meira að segja búin að fara í skátamessu, fermingu og skírn með tilheyrandi veisluhöldum og ég pissa bara í klósettin þar sem ég er!
Mer finnst skemmtilegast að sturta niður :)

Er ekki rétt að láta það fylgja hérna að litli frændi minn sem var skírður á laugardaginn heitir Jóhann Ingi Magnússon.

kv, Sigrún Aðalheiður

orðin hress

2006-04-13T07:42:00.000-07:00

Ég er orðin hress :) það er víst ekki gott að hafa svona veikindapistla of lengi efst!

Afi minn er kominn heim, ég var dálítið feimin við hann en það lagast örugglega bráðum, það getur nú verið skrýtið að sjá allt í einu einhvern sem maður hefur bara ekki séð í heilan mánuð!

Afi kom með baðliti og baðmálningu fyrir mig, ég er búin að prófa í baðinu, mér fannst það sko svakalega skemmtilegt og teiknaði krókódíla út um allt baðkar!
Ég er líka núna að æfa mig að pissa í klósett, það sem af er deginum í dag er ekki búið að koma eitt einasta slys! Ég er samt með bleyju núna því ég er sofandi úti í vagni, það væri nú ekki gott ef það kæmi slys þar! en hún fær að fjúka um leið og ég kem inn.
Ég kúkaði meira að segja í klósettið í morgun, ég var pínu lítið hrædd þegar það var alveg að fara að gerast en svo var ég yfir mig ánægð þegar það var búið og ég fékk unga límmiða til að setja á vegginn á móti klósettinu!

mamma ætlar að skella inn myndum líka í dag, og munið eftir gestabókinni.

kv, Sigrún Aðalheiður

Undur og stórmerki gerast enn...

2006-04-03T15:54:00.000-07:00

haldið þið ekki að ég sé orðin lasin eina ferðina enn, það finnst okkur sko ekki skemmtilegt! Gubb hefur alveg fengið nýja merkingu í hugum foreldra minna þessa síðustu daga, gubb er ekki lengur tengt við brjóstagjöf eða timburmenn, nei, nei nú er gubb flóð og fossar af hálfmeltum mat sem spýtist út úr munni af svo miklum krafti að æðar springa í augunum á mér. Ég er líka með mikinn niðurgang og mamma veit ekkert hvað hún ætti að gefa mér að borða, enda skiptir það litlu máli þar sem ég hef lítið sem ekkert borðað síðan á föstudaginn, smá íspinna í gær en það kom allt upp aftur fljótlega.
Þetta byrjaði allt þannig að ég fékk eyrnabólgu og á fimmtudaginn fékk ég penicilin og mér varð svona heiftarlega illt í maganum, mamma og pabbi héldu að þetta væri meðalið og læknirinn ráðlagði þeim að hætta að gefa mér það í gær og sjá hvort að ég myndi ekki þá lagast, en ég er ekkert að lagast, reyndar er ég ekki með hita lengur en alveg hrikaleg mallaveikindi þrátt fyrir það. Svo núna er mér illt í eyrunum og með magapest.
Ég er orðin svo kraflaus af því að borða ekki neitt að ég ligg helst bara í fanginu á mömmu eða pabba á milli þess sem ég æli, kúka og fer í bað. Mamma var að spila fyrir mig á nikkuna í kvöld þegar ég var þokkalega hress en allt í einu datt ég á gólfið og mamma rauk auðvitað til og kíkti á mig og þá var ég sofnuð! Mamma spilar bara á nikku núna vegna þess að ég sat við píanóið í gær og gubbaði svo rosalega að það er ekki líft í kringum píanóið núna sökum gubbufýlu, mamma er búin að bleyta og salta og við ætlum að sjá hvort að lyktin fer ekki við það, sem betur fer slapp samt píanóið sjálft.

kv, Sigrún Aðalheiður

18 mánaða

2006-03-21T04:55:00.000-08:00

Ég fór í 18 mánaða skoðun í gær, fékk fulla skoðun.

læknirinn sagði samt að það væri eitthvað að eyrunum mínum, við ætlum bara að fylgjast með því og sjá til.

ég er orðin rúm 10 kíló og 77,5 cm og svakalega dugleg. Tala helling og er farin að gera hreyfingar í mörgum lögum sem er verið að syngja hjá Dóru og svo auðvitað það sem við mamma erum að syngja heima.

Ég er orðin mjög dugleg að sofna sjálf, undanfarin kvöld hefur mamma bara lesið fyrir mig og sagt svo góða nótt, þá sný ég mér bara á hliðina og fer að sofa, án þess að það heyrist eitt tíst eða röfl, reyndar skæli ég smá ef að kisi stígur á mig þegar ég er sofandi en þá kemur mamma bara og tekur hann úr rúminu.

Ég bý við mikinn skort núna, afi minn er í burtu og verður í 3 vikur í viðbót, Kristín frænka mín er búin að vera í Bandaríkjunum síðan í febrúar og Jóna amma er farin í pólitíkina, svo það er ekki skrýtið að mamma hafi ekki tíma til að skrifa og senda inn myndir, þið sem eruð að kvarta í gestabókina getið bara sjálfum ykkur um kennt! :)

Annars skellti mamma inn alveg fullt fullt af myndum í dag.

kv, Sigrún Aðalheiður

Er ekki kominn tími á jólapistil?

2006-03-13T04:55:00.000-08:00

hvað finnst ykkur?

Svona getur þetta verið, það óx henni mömmu svo í augum að skrifa um jólin, það var eitthvað svo ægilega mikið að hún ákvað að geyma það bara aðeins, svo geymdi hún og geymdi og alltaf varð meira og meira til að skrifa um.
Annars liðu jólin bara eins og þau eiga að gera, góður matur, pakkar, veislustand, jólaball og allur sá pakki. Áramótin voru heldur betur skemmtileg, fullt fullt af ''bammi'' og mér fannst það alveg svakalega skemmtilegt, afi í Fjarðarstræti er nú ennþá að lauma að mér einu og einu bammi mér til mikillar gleði.

Ég er farin að tala heilmikið eins og við er að búast, enda orðin rúmlega 17 mánaða! Það bætast við fullt af nýjum orðum á hverjum degi, sumt skilja mamma og pabbi ekki og þá verð ég oft mikið pirruð.

Ég veiktist í lok janúar og er búin að vera með hor síðan, en mömmu finnst það vera minnkandi og heldur kannski að þetta sé að verða búið í bili.

Vinstri fóturinn virðist alltaf vera að snúast meira og meira inn á við og nú er svo komið að ég gæti farið að stíga á tærnar á vinstri með hægri þegar ég labba, mamma er að spá í að kaupa bara á mig tvo hægri skó og hjá hvort að vinstri lagist ekki af að vera í ''krummafót''

pistillinn var svo langur að hann komst ekki í eina færslu svo að næsti er framhald af þessum.

kv, Sigrún Aðalheiður

framhald

2006-03-13T04:53:00.000-08:00

Það gengur alltaf jafn vel hjá Dóru í Dórukoti, hún er komin með nýja heimasíðu og þar er m.a. hægt að sjá myndir af mér og hinum krökkunum þar, mæli með því að þið kíkið þangað, slóðin er www.123.is/dorukot allir að kíkja og sjá hvað ég er að gera þar.

Mér finnst mjög gaman að lita núna, ég litaði í píanóbókina hennar mömmu og á eldhúsgólfið, svakalega flott hjá mér!

Það er nýbúinn að vera bolludagur og ég fór ''að maska'' eins og vera ber, ég var ungi og fannst það mjög gaman, ég fór í bæinn með Söru Emily kanínu, Herði Christian dreka, Kristjáni Una tígrisdýri, Katrínu mörgæs og mömmu belju. Við fengum fullt af nammi og svo leyfði afi okkur að halda á stjörnuljósum, það var nú ekki leiðinlegt! Um kvöldið vorum við mamma svo heima og tókum á móti krökkum sem komu hingað að maska, mér fannst svakalega gaman að gefa krökkunum nammi.

Mamma ætlar að reyna að druslast til að setja inn nokkrar myndir í dag, þið fylgist með

Gestabókin er í einhverju klikkelsi, allt fullt af einhverjum auglýsingum þar sem við ráðum ekkert við svo ég mæli bara með því að þið notið barnalandsgestabókina allavega núna í einhverja daga á meðan við reddum þessu.

kv, Sigrún Aðalheiður

myndir

2005-12-10T06:18:00.000-08:00

mamma skellti inn nokkrum myndum frá síðustu tveimur mánuðum! það voru ekki settar inn neinar myndir allan nóvember! hún mamma...

en vegna einhver klúðurs eru myndirnar allar í ruglaðri röð, það verður bara að hafa það

kv, Sigrún Aðalheiður

Stór

2005-12-10T05:29:00.000-08:00

Ég fór í mælingu í gær og er orðin 76,5 cm og 9,8 kg - flott hjá mér.

Annars er maður eitthvað svakalega klukkaður, bara tvö klukk í einu!

jæja, hér koma þá 5 staðreyndir um mig:

1. ég er orðin dálítil frekjudolla
2. ég er að læra að segja svona 3 ný orð á hverjum degi núna
3. ég er að æfa mig að pissa í kopp og finnst það rosa gaman
4. ég er dálítið matvönd
5. ég er svakalega dugleg að passa að mamma og pabbi gleymi ekki hausunum á sér einhversstaðar

og aftur:

1. mér finnst svakalega gaman að vera fín
2. ég vill ekki láta bursta efri tennurnar í mér
3. ég er ennþá bara með 4 tennur
4. ég er nammigrís
5. ég sef til 11 á morgnanna ef mamma vekur mig ekki

Að lokum klukka ég:
Birgittu, Bryndísi Heklu, Eik, Eyþór Atla og Benedikt Eystein

og svo:

Ragnheiði, Kötlu, Heiðrúnu, Freyju Dís og Ásgerði Pálu

prinsessan sem átti 365 kjóla

2005-11-19T07:47:00.000-08:00

Ég er auðvitað löngu orðin hress, mamma er bara svo löt að skrifa! Ég var samt alveg svakalega mikið veik síðast, var veik í 5 daga og hitinn fór hæst í 41,3 þá stóð mömmu nú ekki á sama! Ég er búin að vera hálf slöpp núna síðan á fimmtudag, var með smá hita þá svo hitalaus á föstudag fram á kvöld fékk þá 39,1 og er svo hitalaus í dag laugardag en er dálítið lítil í mér.
Ég er svo heppin að eiga nokkrar stórar frænkur sem eru algjörir kjólapúkar. Ég er búin að fá tvær fatasendingar frá þeim núna með stuttu millibili og vitið þið bara hvað? Ég á 29 kjóla sem passa á mig núna!!! Ég gæti sem sagt verið allan febrúar í nýjum kjól á hverjum degi! Mest allt er frá Snjólaugu, Sólrúnu og Gabríelu en svo saumaði amma einn kjól og Kristín frænka hefur gefið mér nokkra... Ég hlýt bara að vera prinsessa í dulargervi!

kv, Sigrún Aðalheiður

Aftur og nýbúin

2005-10-31T04:14:00.000-08:00

Dóra dagmamma sendi mömmu sms í hádeginu: Sigrún aftur komin með 39,1

Ég er sem sagt lasin enn eina ferðina!
...og mamma búin með veikindadagana í vinnunni...

kv, Sigrún Aðalheiður

Nýjir félagar

2005-10-28T13:14:00.000-07:00

Haldið þið ekki að tennur 3. og 4. hafi látið sjá sig í vikunni! Alltaf að græða!

Þessi veikindi mín um daginn voru vírus, ég steyptist öll út í rauðum útbrotum og var með 40 stiga hita í nokkra daga og svo bara lagaðist það. Mömmu finnst ég voða oft veik...

Ég fór út að leika í snjónum í gær, það var sko gaman, ég var að moka snjó í fötu og labbaði með mömmu í búðina, okkur er eiginlega farið að vanta snjóþotu!

Ég er alveg að læra helling að tala þessa dagana. Ég er farin að segja húfa, mamma, pabbi, rotta, og ábygilega fleiri orð sem mamma man ekki eftir núna.

kv, Sigrún Aðalheiður

Lasin :(

2005-10-17T13:34:00.000-07:00

Ég er orðin lasin, ég var með 39 stiga hita í gær en var svo orðin hitalaus seint í gærkvöldi, mamma ákvað samt að senda mig ekki til Dóru í dag. Ég svaf mjög illa í nótt, mamma var alltaf að heyra einhverja smelli og skildi ekkert í því, svo leit hún í rúmið mitt og tók þá eftir því að það voru alltaf að koma svona blossar þegar ég hreyfði mig, ég var í flísnáttfötum og það hafði byggst upp svona mikið rafmagn að þegar ég hreyfði mig þá kviknuðu blossar, það var ekki þægilegt...
Mamma náði mér úr náttfötunum við illan leik því hún var alltaf að fá straum, og ég hjálpaði ekki beint til... og þá svaf ég eins og steinn alveg til hálf ellefu í morgun og var síðan komin með gubbupest eftir hádegið... Ég er alveg hitalaus, bara slöpp og gubbandi svo mamma æltar heldur ekki að senda mig til Dóru á morgun. Við verðum bara heima í rólegheitum saman.

kv, Sigrún Aðalheiður

Svo fín!

2005-10-16T13:32:00.000-07:00

Ég fór í klippingu á laugardagskvöldið og ég er svo rosalega fín! Mömmu og pabba finnst ég hafa elst um 2 ár! Birgitta vinkona mömmu klippti mig og ég var bara dugleg á meðan, fór ekkert að skæla eða neitt en samt þurfti ég að sitja kyrr alveg rosalega rosalega lengi!

Það koma myndir af þessu þegar mamma finnur myndavélina.

kv, Sigrún Aðalheiður

Meee meeee

2005-10-09T10:08:00.000-07:00

Ég var að horfa á spaugstofuna í gær og varð alveg dolfallin þegar ég sá kindurnar svo pabbi fór með mig í fjárhúsið í dag að skoða kindur. Það var svakalega gaman, ég skældi pínulítið fyrst þegar pabbi setti mig niður en svo var bara rosalega skemmtilegt. Ég fékk líka að setjast í dráttarvélina!
Svo fórum við pabbi til ömmu í Móholti og fengum pönnukökur :)

Í kvöld förum við í mat til ömmu og afa í Fjarðarstræti, það verður nú gaman að hitta ömmu, hún er búin að vera í Reykjavík síðan á þriðjudaginn!

Það eru myndir af fjárhússferðinni á myndasíðunni

Jæja, loksins loksins...

2005-10-08T08:22:00.000-07:00

...skrifar mamma á síðuna mína!!!

Ýmislegt hefur á daga mína drifið undanfarið sem hefði nú mátt láta vita af!

Ég fór í sund á Flateyri með mömmu og Kristínu frænku á síðasta sunnudag og það var svakalega gaman, það var orðið langt síðan við fórum síðast í sund. Sem var sko alveg greinilegt því að mamma var augljóslega búin að steingleyma hvað maður þarf að taka með þegar maður fer í sund, hún gleymdi að taka með bleyju!! Svona getur hún verið, en mamma ákvað að taka bara áhættuna og lét mig vera bleyjulausa á leiðinni heim. Við vorum að fara í kaffi til langömmu og langafa í Miðtúni svo við komum við heima hjá okkur í leiðinni og sóttum bleyju svo þegar við komum til langömmu þá var ég ekkert búin að pissa! Samt nýkomin úr sundi og ábyggilega 45 mínútur síðan ég var sett í föt. Rosalega dugleg!!!

Svo er ég búin að vera í basli undanfarna tvo daga, ég er alltaf á hausnum, ég er núna með fjórar kúlur, tvær skrámur og bólgið nef, ég er búin að detta svo oft að hvorki mamma né Dóra dagmamma hafa tölu á því! Ég datt út úr rúminu inni í herbergi og ofan í dótakassann og fékk blóðnasir og allt! Mömmu finnst þetta nú aðeins vera að lagast hjá mér samt. Ég er ekki eins völt í dag eins og í gær og í fyrradag.

kv, Sigrún Aðalheiður

Dugleg stelpa!

2005-09-21T14:01:00.000-07:00

Vitið þið hvað ég var dugleg í dag? Ég labbaði alla leið heim frá Dóru dagmömmu, mamma leiddi mig en ég labbaði alla leiðina! Það er nú ekkert rosalega langt, mamma er svona 30 sekúndur að labba en mér fannst þetta mikið ævintýri og þurfti að skoða margt á leiðinni.

kv, Sigrún Aðalheiður

Frábær afmælisveisla

2005-09-18T13:58:00.000-07:00

Þá er búið að halda upp á afmælið mitt. Það var gert í gær og heppnaðist bara nokkuð vel. Okkur reiknast til að hingað hafi komið 35 gestir sem er nú ekkert smáræði! Dagurinn heppnaðist bara vel og allir voru ánægðir, mér fannst gaman að leika við krakkana, Sara sem á heima uppi kom og litli bróðir hennar sem er bara agnar pínku pons og svo kom Sigrún Arna með sína krakka og Jóhanna frænka kom auðvitað. Ég var bara að leika mér, skipti mér ekkert af kökum eða pökkum, mamma þurfti að sja um það allt saman fyrir mig, hún var reyndar farin að hafa áhyggjur af mér seinnipartinn því ég var ekkert búin að borða allan daginn, það endaði nú bara með því aðhún bjó til hafragraut og við fengum okkur fulla skál af hafragraut eftir veisluna. Ég gisti svo hjá Halldóru ömmu um kvöldið, það var gaman eins og alltaf!

kv, Sigrún Aðalheiður

Orðin 1. árs!

2005-09-14T00:16:00.000-07:00

14. 09.05 klukkan 02:50

svona var ég þegar ég varð eins árs.

kv, Sigrún Aðalheiður

að bresta á með afmæli...

2005-09-13T16:54:00.000-07:00

Það er að bresta á með afmæli. Klukkan 02:50 í nótt verð ég 1. árs. Hugsið ykkur, finnst ykkur ekki stutt síðan ég var alveg pínu pínu lítið kríli sem gat ekkert gert nema étið, sofið og grátið?
Ég fór í mælingu og sprautu í gær og er orðin 9200 grömm og 73,5 cm. Það er bara nokkuð gott finnst mömmu.
Á laugardaginn klukkan 3 verður haldið upp á afmælið, mamma ætlaði að hringja og bjóða í dag en gleymdi því, haldið þið að það sé nú!?! gleymir að bjóða í fyrsta afmælið hjá einkadótturinni! Er það nú!

Það eru komnar inn nokkrar nýjar myndir frá fjallaferðinni og ýmsu hér heima. Ekki gleyma gestabókinni.

kv, Sigrún Aðalheiður

Fjallaferð og nýtt herbergi

2005-09-11T02:57:00.000-07:00

Ég fór í fjallaferð með mömmu og pabba, ömmu Halldóru, Írisi, Heiðdísi og Elvu, Barða, Áslaugu og Jóhönnu um síðustu helgi. Við fórum í fjallaskálann sem Elva og Barði eiga í Mjóafirði og það var alveg rosalega gaman, ég fór í heitapottinn og út að leika með gröfuna, ég fékk líka að fara á pallinn á stóra bílnum hans Barða og þá var sko frussað! (það er ég að segja brrrbrrrbrrr við bílana) Ég sagði líka brrrbrrrbrrr allan tíman meðan ég var vakandi í bílnum á leiðinni.

Mamma og pabbi eru búin að búa til herbergi handa mér heima hjá okkur. Núna er allt dótið mitt komið inn í ''græna'' eins og það hefur verið kallað hingað til en verður núna kallað Sigrúnar herbergi. Ég er með stóran spegil á veggnum og mér finnst alveg rosalega gaman að skoða stelpuna sem er alltaf þar. Hún brosir alltaf þegar ég brosi og hún meira að segja kemur til mín þegar ég labba í áttina til hennar, svo ef ég dett þá dettur hún líka!

Já þið sáuð rétt, þegar ég LABBA í áttina til hennar. Ég er nefninlega eiginlega alveg farin að labba núna, ég er hætt að þora bara að taka nokkur skref á milli fólks heldur er ég núna farin að storma út í óvissuna. Ég er auðvitað ennþá frekar reikul í spori og ef ég þarf að flýta mér mikið þá læt ég mig detta niður á hnén og skríð á ógnarhraða!

kv, Sigrún Aðalheiður

Upp stigann

2005-08-29T03:44:00.000-07:00

Hvað haldið þið, ég labbaði eða eiginlega frekar klifraði upp stigann hjá ömmu og afa í Fjarðarstræti í gær! alveg sjálf! Ég hefði dottið í efsta þrepinu ef að mamma hefði ekki staðið fyrir aftan mig...

kv, Sigrún Aðalheiður

Byrjuð hjá dagmömmu

2005-08-26T01:06:00.000-07:00

Ég er búin að vera í aðlögun hjá dagmömmu þriðjudag, miðvikudag og fimmtudag og svo núna er ég bara byrjuð. Hún heitir Halldóra Norðdahl og á heima bara rétt hjá mér, í Aðalstræti 12, hún er rosalega góð og ég hef bara ekkert skælt þegar mamma er að fara. Ég verð hjá henni frá 8 á morgnanna til 12 á hádegi og fæ að borða hjá henni. Svo er ég búin að vera að æfa mig að sofa bara einu sinni á dag, það er dálítið erfitt en verður auðveldara með hverjum deginum. Mamma er líka með leiðindi við mig á nóttunni, nú er hún að heimta að ég hafi eitthvað yfir mér þegar ég sef, við erum að byrja að æfa okkur í því og núna erum við bara að prófa með taubleyju, en það er svo skrítið að lappirnar mínar verða alltaf brjálaðar þegar mamma setur hana á... hvað þá ef hún myndi reyna að setja teppi eða sæng!

kv, Sigrún Aðalheiður

Komin heim frá Horni

2005-08-21T16:22:00.000-07:00

Nú er ég aldeilis búin að vera í ferðalagi! Laugardaginn 13. ágúst fórum ég, mamma og pabbi og Kristín og Björn með bátnum hans afa alla leið að Horni í Hornvík þar sem Guðný langamma mín átti heima þegar hún var lítil stelpa. Það var rosalega notalegt að vera þar þó að veðrið hefði stundum verið svo vont að ég gat lítið farið út. Ég labbaði samt marga hringi á pallinum með labbikerruna mína og fór í smá göngutúr með Kristínu frænku og mömmu, ég var í bakpoka og við löbbuðum alla leið út að ''trölli'' en það er stór klettur í fjörunni sem mamma og Kristín frænka segja að hafi einu sinni verið tröllkarl. Á þriðjudeginum fóru Kristín og Björn og pabbi að leita að þýskum ferðamanni sem var týndur í Hælavík og við mamma vorum bara aleinar heima í kotinu. Svo þegar þau komu heim borðuðum við kjötsúpu og mér fannst hún alveg ágæt. Annars er ég ekki búin að vera eins dugleg að borða þessa viku eins og undanfarið, það lagast vonandi núna þegar við erum komin heim. Á þriðjudagskvöldið gistu Reimar og Siggi hjá okkur vegna þess að þeir voru búnir að vera í björgunaraðgerðunum allan daginn og áttu að sækja hóp í Höfn morguninn eftir og nenntu ekki að sigla alla leið heim til sín í Bolungarvík á ströndum. Mér fannst Reimar eitthvað ''afalegur'' og vildi bara vera hjá honum meðan þeir voru hjá okkur.
Á miðvikudeginum kom Guðjón vinur hans pabba til okkar á flugvél! Allir nema við mamma fóru að sækja hann inn í ós í svakalega miklu brimi og dálítið vondu veðri. Okkur mömmu var hætt að lítast á blikuna eftir að við sáum gúmítuðruna hverfa í brimið og sáum hana svo bara alls ekkert meira í meira en klukkutíma! En svo komust þau nú öll heilu og höldnu til okkar. Á fimmtudeginum kom flugvélin aftur og þá með Greip vin hennar mömmu sem var líka að koma að heimsækja okkur.
Mamma og pabbi komust að því í ferðinni að mér finnast rúsínur alveg rosalega góðar og harðfiskur líka, en þeim þótti leiðinlegt að ég á í dálitlu basli með að gera greinarmun á rúsínum og flugum annars vegar og harðfiski og timbri hins vegar...
Við fórum í strandferð inn í ós og mamma og Greipur gerðu fínan sandkastala, ég borðaði dálítinn sand og fannst hann bara mjög góður, ég varð svo þreytt að ég sofnaði í gúmítuðrunni á leiðinni heim og vaknaði ekki einu sinni þegar Kristín frænka tók mig úr björgunarvestinu og pollagallanum og setti mig í vagninn. Svo svaf ég bara í marga klukkutíma!
Afi kom svo og sótti okkur á bátnum sínum laugardaginn 20. ágúst og ég er búin að sofa meira og minna síðan! Í kvöld fórum við í mat til ömmu og afa í Fjarðarstræti og ég var að æfa mig að labba og fór mest 5 skref, mömmu finnst það nú bara nokkuð gott! Svo var ég rosalega ánægð með mig.

Allir að muna að kvitta í gestabókina mína. Mömmu hafa borist kvartanir frá ættingjum sínum um að hún sé of löt að skrifa hérna, en þið kæru ættingjar, þurfið þá að fara að kvitta í gestabókina!

Við skellum inn myndum frá Hornvíkurferðinni á eftir.

kv, Sigrún Aðalheiður

lítið matargat

2005-08-08T14:01:00.000-07:00

Ég er alveg orðin hress núna og er alltaf jafn dugleg að borða, mömmu þykir nú stundum bara nóg um til dæmis í kvöldmatnum í kvöld borðaði ég 530 grömm sem er álíka og ef að mamma myndi borða 3,4 kíló! En ég er að stækka!
Ég gisti hjá ömmu í Móholti aðfararnótt sunnudags, það var rosalega gaman eins og alltaf, Íris var þar líka. Á sunnudaginn fór ég í mat til ömmu og afa í Fjarðarstræti og borðaði alveg fullt fullt af gulrótum, gæs og sveppum, þetta var alveg rosalega gott, og ég er svo mikið matargat!
Í dag fórum við mamma í skógarferð, mamma þurfti að fara inn í skóg útaf vinnunni sinni og ég fékk að fara með svo fóru mamma og Gísli pabbi hans Greips að skoða göngustíga en ég var bara að leika við hana Lenu og fannst bara gaman, ég borðaði fullt af berjum, mér þykja þau alveg rosalega góð, sérstaklega bláberin.

mamma ætlar að reyna að skella inn nokkrum myndum ef að ég verð til friðs í kvöld.

kv, Sigrún Aðalheiður

Á batavegi

2005-08-01T13:19:00.000-07:00

Ég er búin að vera lasin síðan við komum heim af skátamótinu, ég fékk 40 stiga hita og var alveg hrikalega slöpp og ólík sjálfri mér! Svo fékk ég útbrot á laugardaginn og þá kom í ljós að þetta var 5. veikin, sem er barnaveiki í ætt við mislinga. Nú er ég búin að vera hitalaus í tvo daga en er ennþá nokkuð slöpp en þó öll að hressast, mamma sér það á því að ég borðaði 4 desilítra af hafragraut í hádeginu, þá er hún aftur farin að þekkja stelpuna sína! Ég er ennþá með útbrot í andlitinu og á bringunni og bakinu en annars eru þau alveg að verða farin líka.

kv, Sigrún Aðalheiður

komin heim af skátamóti

2005-07-28T08:17:00.000-07:00

Æjæjæj, nú er orðið langt síðan eitthvað hefur verið ritað hér á síðuna mína! Það er bara búið að vera svo rosalega mikið að gera hjá okkur! Ég er orðin 10 mánaða og fór í vigtun og mælingu af því tilefni. Ég er orðin 8810 gr og 71 cm, ekkert smá stór!
Ég og mamma erum nýkomnar úr ferðalagi. Við fórum með Jónu ömmu, Henry afa, Bæring frænda og öllum skátunum á landsmót skáta á Úlfljótsvatni. Ég og mamma sváfum í tjaldi í heila viku! Og mér líkaði það bara vel. Veðrið var alveg rosalega gott bara sól og stundum smá vindur, og svo var þoka á kvöldin. Það hefði eiginlega verið verra ef það hefði verið betra! Ég og mamma fórum með afa og Bæring frænda á afa bíl á mótið, ég var alveg rosalega dugleg í bílnum, var eiginlega ekki neitt að skæla þó að það væri alveg rosalega heitt og við værum alveg hrikalega lengi! Svo var ég bara frjáls á skátamótinu, ég var bara úti að leika mér í heila viku! Ég var að leika við alla krakkana og svo fékk ég fullt fullt af ís :)
En maður verður sko þreyttur á svona skátamótum, ég sofnaði alltaf á kvöldin og svaf alla nóttina í flísgallanum mínum, mamma reyndi fyrstu nóttina að láta mig sofa í kerrupokanum en ég var alveg brjáluð að geta ekki spriklað og hreyft mig svo að ég fékk bara að sofa í flísgallanum í engum svefnpoka og þá gekk þetta fínt. Ég fór á varðeld og kvöldvökur, það var samt svo seint og ég var svo ofboðslega þreytt að á aðalvarðeldinum þá sofnaði ég bara á meðan 6000 manns voru að öskra, stappa, hoppa, klappa og syngja í kringum mig. Svo var flugeldasýning, flottasta flugeldasýning sem enginn hefur séð, eins og afi sagði, en það var svo mikil þoka að flugeldarnir sáust ekki, ég rumskaði ekki einu sinni við það!
Ég fékk tvö flugnabit en ég fann ekkert fyrir þeim, það komu bara tveir rauðir punktar sem fór svo strax aftur, það var annað en hjá mömmu, hún fékk nefnilega flugnabit undir ilina sem ætlaði aldrei að fara!
Ég er orðin rosalega sólbrún, mamma skilur ekkert í þessu, ég er miklu sólbrúnni en hún!
Við fórum heim með krökkunum í rútunni og ég var svakalega góð í bílnum! Ég skældi bara eiginlega ekki neitt!
Þegar við komum heim á þriðjudagskvöldið þá byrjaði ég að vera slöpp og á miðvikudagsmorguninn var ég komin með 40 stiga hita og er ennþá frekar slöpp, með 39 stiga hita og sef bara mest allan daginn.
Mamma ætlar að setja inn nokkrar myndir núna en svo þegar amma og afi koma heim frá Laugavatni ætlar mamma að setja inn fleiri skátamótsmyndir sem afi tók á þeirra myndavél.

Kv, Sigrún Aðalheiður

lítlill ferðalangur

2005-07-01T15:59:00.000-07:00

Nú er ég sko aldeilis búin að fara í ferðalag!
Við ætluðum að fara að Horni, þar sem Guðný langamma átti heima þegar hún var lítil en báturinn hans Henrys afa bilaði á leiðinni svo við fórum bara í Aðalvík, þar sem Bæring langafi átti heima þegar hann var lítill! Þar er nú gott að hafa svona marga sumarbústaði í fjölskyldunni! Ég var svolítið sjóveik á leiðinni, sérstaklega eftir að stýrið bilaði því að þá gat Henry afi ekki ráðið hvernig öldurnar komu á bátinn og við vorum bara að reka. Og öldurnar voru svolítið stórar, meira að segja mamma var svolítið sjóveik, hún sem er aldrei sjóveik!
Það var rosalega gott að vera í Ellubæ, ég var náttúrulega mikið þar í fyrra sumar þegar ég var í bumbunni hennar mömmu.
Ég fór í langan göngutúr í bakpoka, við ætluðum yfir í Skáladal en þorðum ekki alla leið vegna þess að við vissum ekki hvað við hefðum langan tíma áður en flæddi aftur upp að ófærunni. Ég, afi, Jóhanna, Pétur og Birna snérum við fyrst en mamma, pabbi, Jóna amma, Andrea, Kristín frænka og Bæring frændi fóru út í helli sem er hinu megin við ófæruna og biðu svo til að vita hve langan tíma maður hefði til að fara út í Skáladal. Daginn eftir fóru svo allir nema ég og mamma og pabbi í Skáladal.
Skotta litla var ofsalega dugleg í ferðinni. Hún var svo þreytt og sárfætt greyjið undir lokin að hún gat varla gengið, enda búin að hlaupa víkina þvera og endilanga marg oft!
Tímaskynið okkar fór alveg í rugl, eins og tilheyrir nú í svona ferðum, stundum var ég að fara út í vagn að sofa klukkan 8 á kvöldin! Kvöldmatur um miðnætti og hádegismatur klukkan 2. Afi Henry bakaði klatta í kaffitímanum einn daginn og ég fékk að smakka og það var sko rosalega gott! Það var samt klukkan 7 um kvöld! Svona verður þetta hjá okkur norður á Hornströndum, allt fer bara í vitleysu! Síðasta kvöldið fór ég ekki að sofa fyrr en klukkan 1 um nóttina! Enda vaknaði ég ekki fyrra en seint og um síðir. Mömmu og pabba finnst það ágætt svona í sumarfríinu að ég sofi svona lengi!
Jæja, ég var heilmikið úti í góða veðrinu og fór meira að segja í bíltúr á hjólbörum með pabba!
Ég var rosalega dugleg að taka til í blaðastöflunum hennar langömmu, ég var alveg sérstaklega hrifin af Séð og heyrt vegna þess að það er svo skrautlegt. Ég var líka dugleg að æfa mig, núna er ég farin að segja baba og mama og klappa saman lófunum og svo er ég líka orðin dugleg að standa sjálf. Ég tók meira að segja eitt skref frá sófanum til mömmu!
Ég var ekkert sjóveik á heimleiðinni, enda voru þá miklu minni öldur og báturinn ekkert bilaður. Ég fór samt ekki að sofa fyrr en eitt um nóttina þegar við komum heim og ég og pabbi ákváðum að sofa bara út í morgun, mamma fór í vinnuna og við vorum bara heima að stússast við pabbi.
Svo fórum við nefnilega í afmæli til Bærings frænda, en hann er 11 ára í dag. Mér fannst voða gott að fá kökur, við fórum svo ekki úr afmælinu fyrr en rosalega seint vegna þess að mamma sofnaði! Já hún var svona þreytt kerlingin, og enginn gat vakið hana! Hún vaknaði ekki fyrr en klukkan 9. Maður þarf sko að vera orðinn svolítið mikið þreyttur þegar maður getur bara sofið eins og steinn í 11 ára afmæli.
Pabbi er núna úti í skúr að laga bílinn því að við erum að fara í annað ferðalag á morgun! Mamma er nefnilega að fara að spila í brúðkaupi á Tálknafirði á morgun. Við ætluðum að fara í dag og koma til baka á sunnudaginn en mamma og pabbi bara nenntu því ekki, í staðinn ætlum við bara að taka með okkur sundfötin og leggja snemma af stað í fyrra málið, hafa það svo bara notalegt á Tálknafirði og keyra heim aftur um kvöldið.

Jæja, þetta er nú bara orðin lengsta bloggfærslan til þessa. Bæring frændi, til hamingju með afmælið. Og allir að muna að kíkja á myndasíðuna, og svo auðvitað að skrifa í gestabókina.

Kv, Sigrún Aðalheiður

Hæ! 17. júní

2005-06-18T16:02:00.000-07:00

Ég er komin með aðra tönn!

Það er allt bara búið að ganga vel hjá okkur þessa dagana. Ég er í pössun hjá Heiðdísi og Bylgju á daginn þangað til mamma kemur heim úr vinnunni og svo erum við bara að leika okkur fram á kvöld þangað til ég fer að sofa. Mömmu finnst ömurlegt að þurfa að vera svona lengi í vinnunni á daginn og láta mig vera svona lengi í pössun, þess vegna reynir hún alltaf að koma heim eins snemma og hún getur :)
Mér líður rosalega vel hjá Heiðdísi og Bylgju en er samt alltaf rosalega glöð að sjá mömmu þegar hún kemur heim. Svo má mamma ekkert gera það sem eftir er dags vegna þess að þá fæ ég svo svakalega ''mömmuverki'' en það er nú samt að lagast, ég er að venjast þessu.
Við mamma fórum á 17. júní hátíðarhöld á sjúkrahústúninu í gær og mér fannst bara gaman, ég var samt svolítið hissa á öllu saman svona til að byrja með. Ég var rosalega spennt fyrir blöðrunum, vildi alltaf hafa allar blöðrur sem aðrir krakkar voru með, sérstaklega þær sem voru silfurlitar og ég sá sjálfa mig speglast í, þetta endaði svo með því að afi sendi Bæring frænda með pening til að kaupa fyrir mig blöðru, ég er núna búin að vera að leika mér með hana í dag og skemmti mér konunglega.

Ég fór svo í smá útilegu með mömmu, Kristínu frænku, Bæring frænda og Jónu ömmu, skátakrakkarnir eru nefnilega í útilegu í Skálavík og við fórum að heimsækja þau í dag. Amma og Bæring frændi ætla að gista þar í nótt og Henry afi líka, en það er of kalt fyrir svona litla hornös eins og mig.
Stóru strákarnir voru að hoppa í ána og mér fannst voða leiðinlegt að mega ekki líka fara í sund!

Ég er búin að læra að segja hæ. Öllum þykir það voða fyndið og krúttlegt. Ég segi alltaf hæ þegar ég hitti einhverja nýja, og þegar það er bankað, og þegar dyrabjallan hringir og alltaf þegar mig langar til. Ef ég er glöð þá segi ég HÆ.

kv, Sigrún Aðalheiður

Ferðalagið

2005-06-07T14:21:00.000-07:00

Ég fór í ferðalag um helgina. Mömmu og pabba fannst ég rosalega dugleg að sitja í bílnum þó svo að ég væri stundum óróleg, en það mátti nú búast við því, því þetta er löng leið! Við ætluðum að sofa í tjaldi í Hvalfirðinum tvær nætur, en við lögðum seint af stað á föstudaginn og þegar við vorum í Borgarnesi í roki og 2. stiga hita klukkan eitt um nóttina ákváðum við að fara bara alla leið í Kópavog og gista þar hjá Gurrý systur hennar Jónu ömmu. Um morguninn fórum við aðeins í sólbað á pallinum og ég skoðaði dótið hennar Gurrýjar og svo fórum við af stað í Hvalfjörðinn.
Þar var nefninlega ættarmót hjá fjölskyldunni hans Bærings langafa og þar hitti ég sko fullt fullt af frændum og frænkum. Það var rosalega gaman. Okkur reiknast til að ég hafi verið næstyngsti gesturinn á ættarmótinu, bara Eik frænka mín var yngri.
Um kvöldið ætluðum við aftur að gista í tjaldi en það var bara svo kalt að við fórum með Henry afa og Kristínu og Birni í Skorradalinn til Halla og Kollu, en Halli er bróðir hans Rúbba og þau eiga sumarbústað í Skorradal og voru einmitt þar um helgina. Við fórum til þeirra og fengum að gista, þar voru tvær litlar stelpur, Hera Rut sem er 22 mánaða og Freyja Rán sem er 2 mánaða, ég náði ekkert að spjalla við þær vegna þess að alltaf meðan ég var vakandi voru þær sofandi! Kannski spjalla ég bara við þær næst.
Við fórum svo úr Skorradalnum rétt fyrir hádegi keyrðum í samfloti með Kristínu frænku og Henry afa og langömmu og langafa í Miðtúni alla leið heim. Bæring frændi kom í okkar bíl til að hafa ofan af fyrir mér og var voða duglegur miðað við hvað ég var orðin þreytt á þessu ferðalagi. Við fórum nefnilega löngu leiðina heim, stoppuðum í Bjarkarlundi og fengum okkur að borða, fórum svo Barðaströndina og kíktum á Patró og Tálknafjörð, svo á Bíldudal og enduðum á að fara í sund í Reykjafirði, það var alveg rosalega gott að fá aðeins að hreyfa sig smá! og svo var laugin líka heit og fín.
Þegar við komum uppúr sundi, brunuðum við beint heim til Jónu ömmu og fengum okkur miðnætursnarl þar áður en við fórum heim!

Rosalega skemmtilegt ferðalag þó svo að við gistum ekki í tjaldi.

kv, Sigrún Aðalheiður

Myndirnar

2005-05-31T10:01:00.000-07:00

Það eru komnar nýjar myndir en því miður fóru íslensku stafirnir í myndatextunum eitthvað á flakk svo að þið verðið bara að giska í eyðurnar.

kv, Sigrún Aðalheiður

Byrjuð í pössun!

2005-05-31T09:34:00.000-07:00

Mamma er farin að vinna svo að núna er ég í pössun hjá Heiðdísi og Bylgju á daginn. Ég er búin að vera núna tvo daga og líkar bara vel!
Mömmu finnst svolítið skrítið að vera svona í burtu frá mér allan daginn, en það hlýtur að venjast.
Ég fór í afmæli hjá Hrafnhildi frænku minni í gærkvöldi og fékk súkkulaðiköku og rjóma, það var rosalega gott.

Ég er orðin ofsalega dugleg í sundi, get alveg farið í kaf og synt og svona en ég vill ekki fara í kollhnís. Svo er ég líka svolítið hrædd við Guðnýju sundkennara, mamma heldur að það sé af því að ég varð svo sár í fyrsta skipti sem ég var sett í kollhnís, og það var hún Guðný sem gerði það. En ég er ekkert hrædd við hana á mömmumognum eða inni í búningsklefa, bara ofan í sundlauginni. Ég er svo skrítin skrúfa!

Afi og pabbi eru báðir að smíða sólpalla, afi heima hjá sér og ömmu en pabbi hér heima hjá okkur. Það verður nú fínt í sumar að geta farið út á sólpall að leika!

Ég hitti Eik frænku mína um helgina, hún er rosalega lítil, enda ekki nema tæplega 3 mánaða, en hún hefur samt stækkað rosalega mikið síðan hún fæddist.

kv, Sigrún Aðalheiður

síðasta skipti á mömmumorgni

2005-05-25T06:55:00.000-07:00

Við mamma vorum að koma af síðasta mömmumorgninum í krikjunni, það var bara gaman, mömmurnar fengu sér súpu í brauði og við krakkarnir lékum okkur :)

Jóhanna frænka var í pössun hjá okkur í gær morgun, það svo sko gaman, það er svo langt síðan við höfum hisst! Við vorum heilmikið að leika okkur saman, og núna er ég farin að ráða aðeins meira við hana ef svo má að orði komast!

Ég er búin að borða undarlega lítið síðustu tvo daga, mamma og pabbi skilja bara ekkert í því, en kannski er ég núna bara að borða eins og venjulegt barn? Hvernig eiga þau að vita það?
Annars er ég bara hress og kát með tönnina mína :)

Núna er staðan á heimilinu aftur orðin þannig að ef mamma eða pabbi eru bara ein heima með mér þá geta þau ekki einu sinni farið að pissa, vegna þess að ég stend upp við allt, dett á hausinn og fer mér að voða á öðru hverju augnabliki! Svo er ég orðin voðalega pirruð að geta ekki labbað sjálf og leiðist að láta alltaf halda í mig...

Mamma vonar eiginlega að ég fari að labba bráðum, því að hún heldur að það sé skárra að vera með litla stelpu (eins og mig) ''vitlausa'' labbandi og glaða heldur en að vera með litla stelpu (eins og mig) ''vitlausa'' ekki labbandi og snaróða í skapinu.
annars tekur örugglega bara eitthvað annað við þegar ég verð búin að læra að labba. En svona hefur þetta gengið með allt sem ég hef lært, stuttu áður en ég læri það þá verð ég svo pirruð að geta það ekki, en svo lagast allt þegar maður lærir eitthvað nýtt!

kv, Sigrún Aðalheiður

Komin tönnsla!

2005-05-22T15:46:00.000-07:00

ÉG ER KOMIN MEÐ TÖNN!!! svaka fína tönn, vinstra megin niðri! hún fannst í gær, 20. maí :) allir voða lukkulegir, svo beit ég mömmu í puttann... ekki eins mikil hamingja með það en samt, voða gaman. Við burstuðum tönnina með tannburstanum sem ég fékk í jólagjöf frá Helgu, Magnúsi og stelpunum og ég var bara hæst ánægð með það. Annars fór ég líka í 8 mánaða skoðun og er orðin 7530 gr og 67,6 cm bara orðin mjög stór og dugleg, mamma var að skoða línuritið mitt og ég er búin að þyngjast akkúrat um hálft kíló á mánuði frá því ég fæddist, við höldum að það sé nú bara fínt. Ég borða svo mikið að mamma og pabbi þurfa að hæra grautinn í steypuhrærivél og þau skilja ekkert hvert þetta fer allt saman! En ég er mjög dugleg og vinnusöm ung stúlka og er á 4000 snúningum allan daginn frá morgni til kvölds, það þarf sko mikla orku í það!
Ég er núna farin að standa upp við allt og labba meðfram hlutum, t.d. labbaði ég hringinn í kringum stofuborðið og sópaði öllu niður á gólf :) voða skemmtilegt. Svo stóð ég upp við sjónvarpsskápinn og sópaði öllu þar niður á gólf og svo framvegis. Ég reyni líka að standa upp úti á miðju gólfi en það gengur ekki eins vel...
Í gær ætlaði ég að vera rosalega dugleg inni í Móholti hjá ömmu og standa upp við blaðagrindina hennar... ég datt auðvitað beint á hausinn og blaðagrindin yfir mig, það var nú samt ekkert hræðilegt, man það bara næst. Ég dett á hausinn svona að meðaltali þrisvar á dag...

Ég er búin að vera dugleg að fara í sund, fór í sund á Flateyri með mömmu, Kristínu frænku og Sif í gær, laugin var ísjökulköld ekki nema 27 gráður þegar við komum í sundið svo við fórum bara í pottinn, mér finnst það rosalega notalegt.

jæja, vonandi líður ekki eins langt þar til það verður skrifað næst.

kv, Sigrún Aðalheiður

frænkur og frændur í tugatali

2005-05-11T08:52:00.000-07:00

Já nú hefur sko ýmislegt gerst síðan mamma skrifaði síðast! Ég er alveg að verða átta mánaða og er farin að standa upp við öll helstu tækifæri og er stundum farin að fara upp á fjóra fætur til að skríða en ef ég þarf að flýta mér mikið þá leggst ég á magann og skríð þannig. Mamma er loksins búin í prófunum (allavega í bili) en það er sko búið að vera ástand hér á heimilinu.
Ég er búin að fara tvisvar í sund og það gekk bara rosalega vel, ég fór í kaf og allt! og fannst það bara allt í lagi.
Ég hitti alveg rosalega mikið af frænkum og frændum um helgina í erfidrykkjunni hennar Helgu frænku, allir voða skotnir í mér! Samt var ég þreytt og pirruð, ég var nefnilega ekkert búin að sofa um daginn en það virtist ekki koma að sök. Svo var ég svo þreytt um kvöldið að ég fór í rúmið milli 9 og 10 og rumskaði ekki fyrr en 11 á sunnudagsmorguninn!
Svo hitti ég líka Benna langafa minn í fyrsta skipti á laugardaginn, en mamma var svo mikill klaufi að hún gleymdi að taka myndavélina með!

kv, Sigrún Aðalheiður

Afmæli

2005-05-01T11:29:00.000-07:00

Ég var í afmæli í dag hjá Jóhönnu, hún verður eins árs á morgun! Hún er sko aldeilis orðin stór stelpa! Fyrst fór ég með Jónu ömmu og Henry afa í Brautarholt til Berglindar og Hagalíns en amma og afi voru að heimsækja þau því að Helga frænka (langömmusystir mín) er dáin.

Ég er orðin rosalega dugleg, skríð auðvitað um allt og er núna líka farin að standa upp við dótakassann minn en stundum sturta ég bara úr honum yfir mig! Ég er að byrja á sundnámskeiði á þriðjudaginn og mamma hlakkar svo til að fara með mig aftur í sund, ég myndi líka hlakka til ef ég hefði eitthvað vit á þessu!

Litla frænkan mín var skírð í dag, hún heitir Eik Ægisdóttir, þið getið kíkt á hana hérna til hliðar, hún er voðalega mikið krútt.

Það er nú rétt að segja frá því að ég er alltaf á hausnum þessa dagana, það líður ekki sá dagur að ég skríði ekki á borð, detti á hausinn eða eitthvað svoleiðis... og svo er ég farin að fá ''mömmuverki'' þegar mamma fer úr augsýn, það er nú samt ekkert hlustað á svoleiðis...

kv, Sigrún Aðalheiður

Sunddrotting!

2005-04-25T02:38:00.000-07:00

Við mamma fórum í sund á Flateyri með ömmu, Bæring frænda og Ragnari á föstudaginn. Mamma ákvað að prófa bara að fara með mig í sund og sjá hvort ég fengi punkta, og það komu engir! svo að við getum farið aftur á sundnámskeið, það byrjar einmitt nýtt núna 3. maí! jeij, mér fannst rosalega gaman :)

Svo á laugardaginn fór ég upp í bústað með mömmu og pabba, það var ennþá soldið kalt í bústaðnum svo að ég þurfti alveg að vera í útigalla og allt, svo gisti ég hjá ömmu og afa í Fjarðarstræti um kvöldið því mamma og pabbi voru í grillveislu í bústaðnum.

Nú er Kristín frænka að koma heim frá Þýskalandi bráðum, jei!

kv, Sigrún Aðalheiður

frussi fruss

2005-04-22T05:56:00.000-07:00

Sumardagurinn fyrsti gekk í garð með æðislega góðu veðri og ég fór í skrúðgöngu með skátunum. Ég var samt svo þreytt að ég svaf bara allan tímann. Svo fórum við í heimsókn til ömmu í Móholti í gærkvöldi og ég var að leika við Írisi og Heiðdísi þar.

Jón frændi, bróðir hans Henrys afa kom í heimsókn til okkar eftir að við vorum komin heim frá ömmu. Hann á heima á Sauðárkróki svo ég hef aldrei séð hann áður, en hann er bara skemmtilegur kall! Hann á lítinn hvolp sem heitir Eygló og er sama blanda og Skottan okkar.

Í hádeginu var mamma að gefa mér að borða og ég hallaði mér aftur á bak og frussaði eins og ég gat! Mér finnst svo gaman að frussa núna. En sem sagt bláberja og epla maukið frussaðist út úr mér og af því að ég hallaði mér aftur á bak þá lenti það allt beint í andlitinu á mér aftur! Myndir af því á myndasíðunni.

Jóhann afi hefði orðið sextugur í dag svo að við pabbi og mamma ætlum að fara inn í krikjugarð á eftir með kerti og svo erum við boðin í grill hjá ömmu í Móholti.

kv, Sigrún Aðalheiður

sól og sumar

2005-04-19T10:17:00.000-07:00

Jahérna, sumardagurinn fyrsti er ekki einu sinni kominn en það er sko aldeilis sól og sumar í dag! Ég og mamma fórum í göngutúr til langömmu og langafa í miðtúni í sólinni og ég sat í vagninum, rosalega dugleg en svo var ég orðin svo þreytt á leiðinni heim að ég sofnaði. Það er svo heitt að það er eiginlega ekki svefnfriður úti! Mamma sá þegar við löbbuðum framhjá torginu að það var 33 stiga hiti þar sem sólin skein á mælinn en hér heima í skugganum er ekki nema 15 stiga hiti, okkur finnst það nú samt alveg nóg!

Ég stóð upp í rúminu mínu alveg sjálf í gær, eða ekki alveg sjálf því að pabbi hjálpaði mér að setjast upp en svo togaði ég mig upp alveg sjálf... og var voðalega montin! ég er líka farin að komast auðveldlega upp á hnén en fatta ekki alveg að skríða svoleiðis

Mamma fann loksins í gær sokkabuxur með ''tökkum'' á hnjánum, hún er búin að leita mikið að svoleiðis fyrir mig en svo voru þær til í apótekinu! Það er sko miklu auðveldara að fara upp á hnén í svoleiðis buxum!

kv, Sigrún Aðalheiður

Nýtt herbergi

2005-04-17T16:14:00.000-07:00

Jæja, nú er herbergið okkar loksins tilbúið! Pabbi er búinn að vera á haus í marga daga að koma herberginu okkar í stand og við mamma á kafi í drasli á meðan! Nú kláraðist þetta í dag, mamma og pabbi búin að þrífa hátt og lágt og allt tilbúið, við ætlum að sofa í nýja herberginu í nótt! Mamma og pabbi þurftu líka að lækka rúmbotninn hjá mér því að ég er farin að reyna að standa upp...

Ég fór í heimsókn til Illu langömmu í Bolungarvík á laugardaginn, það var rosalega gaman, ég hef aldrei áður farið í heimsókn til hennar en ég hef auðvitað oft hitt hana hjá ömmu í Móholti. Svo fór ég í göngutúr í dag með Jónu ömmu og Bæring frænda, og við komum við hjá langömmu í Miðtúni í leiðinni. Ég var voða dugleg, sat í kerrunni alla leiðina og sofnaði ekki neitt!

Mamma skellir inn nýjum myndum. Kíkið á dagsetninguna við myndalinkinn.

kv, Sigrún Aðalheiður

7 mánaða

2005-04-14T07:50:00.000-07:00

Ég er sjö mánaða í dag! og ég er orðin svo stór og dugleg. Ég kann ýmislegt núna, ég get vinkað, bæði með því að veifa hendinni og með því að kreppa og opna lófann. Mér þykir rosalega fyndið ef einhver er týndur og segir svo BÖ! en skemmtilegast finnst mér samt að vera sjálf týnd og koma svo í ljós og einhver segir BÖ!
Ég er búin að vera að gubba rosalega mikið í gær og í fyrradag, mamma heldur að ég sé hreinlega með gubbupest, en svo er ég mikið skárri í dag.
Það er svo gott veður að ég fór með mömmu í göngutúr sitjandi í kerrunni. Það er rosa sport að sjá svona mikið í kringum sig. Það er svo mikil sól að ég er bara með sólhatt!

Ég er rosalega dugleg að tína serjos upp í mig og svo auðvitað ormast ég út um allt gólf og ríf og tæti allt sem ég næ í...

kv, Sigrún Aðalheiður

ballið byrjað hjá ma&pa!

2005-04-07T05:32:00.000-07:00

Ég er alveg farin að fara um allt með ógnarhraða, mikið hraðar í dag en í gær! Mamma þurfti að setja sokka á pedalana á píanóinu og líma þá á því að mér finnst svo voðalega gott að naga pedalana! Þeir eru svo kaldir og góðir!
Við mamma erum búnar að ætla í heimsókn til langömmu og langafa alla vikuna en það er búið að vera svo kalt að við höfum ekki getað farið út í vagni! og bíllinn er bilaður, svo að við verðum bara að vera heima. Vonandi fer nú samt að hlýna bráðum, ég er alveg orðin hundleið á að hanga alltaf inni.

komnar nýjar myndir

kv, Sigrún Aðalheiður

Jæja, passið ykkur nú!

2005-04-06T07:21:00.000-07:00

Sigrún Aðalheiður er komin af stað! Ég er núna farin að draga mig um, þangað sem ég vill fara. Ég ýti með hnjánum og toga með hægri hendi og vinstri olnboga, svona kemst ég ótrúlega hratt! Þið ættuð bara að sjá mig! pabbi dottaði í smá stund þegar hann var að líta eftir mér í gær og ég var bara komin langleiðina fram í eldhús. Mamma var spila á píanóið og ég bara dreif mig fram á gang! Nú á sko að kanna heiminn...
Verst að það er ekki hægt að leyfa mér að fara fram á gang núna vegna þess að pabbi er búinn að leggja allt í rúst. Hann er að vinna í ''gula'' herberginu sem er ekki lengur gult heldur veggjalaust og það er sag og ryk og drulla úti um allt og svo auðvitað er allt dótið sem var inni í gula frammi á gangi svo að ég gæti hæglega farið mér að voða þar!

mamma ætlar að setja inn nýjar myndir í dag, þið sjáið á dagsetningunni við myndasíðuna hvort hún er búin að því eða ekki.

kv, litli landkönnuðurinn

Sigrún Aðalheiður

1. apríl

2005-04-01T15:06:00.000-08:00

Ég var ekkert göbbuð í dag, enda kann ég ekki að hlaupa svo að það hefði ekkert upp á sig...

Ég fékk mína fyrstu byltu á þriðjudaginn, ég rúllaði mér fram úr sófanum hjá ömmu og afa, það var rosalega vont, en ég var fljót að jafna mig! Svo fékk ég fyrstu kúluna í dag, þetta er greinilega allt að bresta á! Sem betur fer er þetta ekkert stór kúla.

Pabbi er byrjaður að laga gula herbergið svo að bráðum ''flytjum'' við þangað, það verður nú gaman, mömmu finnst það herbergi einhvernvegin meira kósý en herbergið sem við erum í núna.

mamma verður að fara að læra núna, það er ekkert sem heitir, ég er sofnuð og pabbi að basla inni í herbergi.

kv, Sigrún Aðalheiður

Aldrei fór ég suður myndirnar komnar

2005-03-29T05:10:00.000-08:00

komnar einhverjar myndir af mér á rokkhátiðinni, allir að kíkja og skrifa svo í gestabókina

kv, Sigrún Aðalheiður

Aldrei fór ég suður og páskarnir

2005-03-28T15:32:00.000-08:00

Ég fór á rokkhátíð á laugardaginn! Ég var alveg dolfallin yfir öllu fólkinu og hávaðanum, við mamma vorum ekkert rosalega lengi en það var samt gaman, hittum fullt af fólki. Ég fékk merki sem ég er með á gallanum mínum.
Eftir að við komum heim, svona milli tíu og ellefu um kvöldið fór að bera á því að fólk kom að pissa í garðinn okkar... Það hélt svo áfram alla nóttina og um morguninn var garðurinn svo útpissaður að Skotta greyjið vissi ekkert hvar hún mátti núna pissa, garðurinn orðinn merktur öðrum í bak og fyrir! Mömmu og pabba er nú eiginlega alveg sama um þetta en þeim finnst soldið leiðinlegt að einhver sem kom að pissa í garðinn um nóttina braut gömlu talíuna af húsinu sem var búin að vera á því alveg síðan það var skipasmíðastöð í gamladaga, en svona er þetta.

Ég fékk páskaegg, alveg helling, það eru komnar myndir af því á myndasíðuna. Mamma ætlaði ekkert að leyfa mér að smakka en svo leyfði pabbi mér aðeins að sleikja púkaeggið og þá var sko ekki aftur snúið! Þetta var algjört æði, þau sættust samt á það að gefa mér ekki mikið, því þá fengi ég örugglega í magann og það finnst okkur svo leiðinlegt.

Ég og pabbi vorum bara ein heima eftir hádegið í dag af því að mamma fór með Jónu ömmu, Bæring frænda og Jóhanni í gönguferð, svo fór ég í pössun til ömmu í Móholti og pabbi og mamma fóru á vélsleða. Svo komu mamma og pabbi til ömmu og við borðuðum þar, ég fékk rjóma, blandaðraáxtamauk, serjos og ís, allt saman voðalega gott.

kíkið á myndasíðuna og ekki gleyma gestabókinni!

kv, Sigrún Aðalheiður

alltaf í pössun!

2005-03-26T10:15:00.000-08:00

Nú er orðið langt síðan mamma skrifaði síðast, Kristín frænka sendi tölvupóst fyrir mörgum dögum að kvarta yfir fréttaleysi! Ég var í pössun hjá ömmu í Móholti aðfararnótt fimmtudags, það var rosa gaman hjá okkur, Íris var líka hjá ömmu, ég var bara góð hjá þeim eins og alltaf. Svo var ég með mömmu í skeytasölunni á fimmtudaginn, ég var nú sofandi mest allan tímann en sá nú samt aðeins hvernig þetta fer fram!

Í gær vorum við mamma heil mikið úti að labba og vesenast svo kom Birgitta vinkona mömmu í heimsókn og svo komu Elsa, Arnar og Ari Þröstur í heimsókn líka. Þau eiga heima á Akranesi en voru í heimsókn hérna á Ísafirði. Ari Þröstur er september kríli eins og ég, hann er bara fæddur 2. september, en hann er sko samt miklu miklu stærri en ég þó hann sé bara nokkrum dögum eldri, ætli ég sé ekki bara svona mikill trítill!

Um kvöldið fóru mamma og pabbi í afmæli hjá Sigrúnu Örnu og ég var í pössun hjá ömmu og afa í Fjarðarstræti sem eru einmitt loksins komin heim frá Þýskalandi! Ég var bara stillt í pössuninni og kom ekki heim fyrr en um hádegi! Ég er reyndar ekki enn búin að koma inn heima því ég er búin að vera sofandi úti í vagni síðan ég kom heim.

Ég þarf að hvíla mig vel því að ég er að fara út í nóttina í kvöld, mamma og pabbi og amma og afi og allir ætla að fara niður í Edinborgarhús á Aldrei fór ég suður tónleikana, það verður örugglega rosa gaman, við mamma kíktum aðeins þangað í dag þegar ég var sofandi í vagninum en það er svo mikið vesen að vera með barnavagninn þar sem er svona mikið fólk að við ætlum bara að fara aftur eftir matinn og þá kem ég bara með ''í hendi'' eins og mamma kallar það, það er nú eins gott að ég er ekki mjög þung!

jæja, þetta er orðið gott í bili, það eru komnar inn nýjar myndir.

kv, Sigrún Aðalheiður

Nýjar myndir

2005-03-18T15:18:00.000-08:00

hvað getur maður orðið skítugur af að borða eitt kex? Kíkið á myndasíðuna!

kv, Sigrún Aðalheiður

Skotta

2005-03-17T12:53:00.000-08:00

jæja, litla stýrið fékk nafnið Skotta. Það er svolítið líkt Snotra sem er hundurinn í fjarðarstræti en það er allt í lagi, okkur finnst bara þetta nafn passa vel við hana.

Það er búið að vera svo mikið rok og kuldi hérna síðustu tvo daga að ég er bara búin að sofa í vagninum niðri í kjallara, mér líkar það svo vel að bæði í dag og ég gær hef ég fengið mér 6 tíma lúr eftir hádegið... frá hálf eitt til hálf sjö! Samt sofna ég bara þokkalega snemma á kvöldin, sef alla nóttina og vakna um klukkan 9. Ég hlýt að vera bara að stækka svona rosalega mikið núna!

Elva, Barði og Jóhanna komu í heimsókn í gærkvöldi, það var voða gaman að leika við Jóhönnu, hún sleit mig úr sokkunum og svo var hún að reyna að klæða mig aftur, það gekk ekki alveg nógu vel... Mamma setti myndir af þessu á myndasíðuna. Annars var Jóhanna svo glöð að sjá Skottu, hún æstist alveg upp!

jæja, munið eftir gestabókinni minni

kv, Sigrún Aðalheiður

Nýr fjölskyldumeðlimur

2005-03-15T14:48:00.000-08:00

Það er kominn nýr fjölskyldumeðlimur á heimilið mitt. Það er HUNDUR, eða eiginlega tík, hún er bara hvolpur ennþá samt, hún fæddist 8. janúar 2005, meira að segja yngri en ég! Það eru myndir af henni á myndasíðunni minni. Það er ekki ennþá búið að ákveða hvað hún á að heita og við óskum hér með eftir tillögum, það hafa nú þegar borist nokkrar og við setjum þær hér: Branda, Helga, Snoppa, Stjarna, Týra, Hetja, Doppa, Randa og Deppla. Þetta eru allt ágætis tillögur og þið megið endilega láta vita, annað hvort í gestabókina eða með e-mail (harpaskarpa@simnet.is) hvað ykkur finnst, og auðvitað koma með nýjar tillögur líka!
Hún er svört og hvít, með svartan búk og hvítan maga, hvítan kraga og hvítt neðan á öllum fótum, hún er með litla hvíta stjörnu á hnakkanum, hvítt í kringum nefið og hvíta týru á skottinu. Hún er líka með brúnar rendur í feldinum á búknum.

En nóg af því, ég og pabbi vorum heima í morgun meðan mamma var aðeins að leysa af í Grísó og við skemmtum okkur bara vel, svo fórum við að stússast soldið þegar mamma var komin heim og fórum svo til Bolungarvíkur að sækja hvolpinn okkar. Svo fórum við til ömmu í Móholti, við pabbi og hundurinn vorum þar meðan mamma skrapp í Bónus. Amma var að baka snúða og mig langaði rosa mikið í en fékk ekki neitt frekar en fyrri daginn... Svo komu amma og afi í Fjarðarstræti og Bæring frændi og Ragnar vinur hans í heimsókn í kvöld, það var voða gaman, þau voru að djöflast í mér og ég var alveg að fíla það! Annars eru amma og afi í Fjarðarstræti að fara til Reykjavíkur á morgun og svo til Þýskalands svo að nú sé ég þau ekki í marga daga.

Góða ferð amma, afi og Bæring frændi.

kv, Sigrún Aðalheiður

6 mánaða!

2005-03-14T15:59:00.000-08:00

Ég er orðin 6 mánaða! mömmu og pabba finnst tíminn hafa liðið svo fljótt! Ég fór í mælingu í dag og er orðin 6,5 kg og 64,5 cm. Bara orðin stór og sterk. Það er búið að vera svo kalt undanfarið að ég hef ekkert getað farið út og mér hundleiðist það, það er samt gaman núna því að það er smá tilbreyting frá því að vera alltaf heima allan daginn með mömmu því að núna er pabbi í fæðingarorlofi og við erum saman heima á morgnanna á meðan mamma er í skólanum.

Ég er farin að smakka allskonar mat núna, er búin að smakka, gulrætur, gúrkur, rófur, kæfu, rjóma, ís, epli, banana, kex og örugglega eitthvað fleira sem mamma man ekki núna. Mér finnst eiginlega allt gott, sumt er soldið skítið fyrst en mér finnst bara svo gaman að borða að ég læt mig hafa það, og þá er það gott eftir smá stund.

Það eru komnar 10 nýjar myndir, meðal annars ein ''gömul'' mynd af mér frá því nóttina sem ég fæddist og svo önnur af mér sem var tekin í dag og það er sko enginn smá munur! Svakalega hef ég stækkað!

mamma og pabbi vilja enn og aftur minna á gestabókina

kv, Sigrún Aðalheiður

afmæli hjá ömmu

2005-03-10T15:10:00.000-08:00

Ég vill minna alla á að skrifa í gestabókina mína, mömmu og pabba finnst svo gaman að sjá hverjir koma að kíkja á mig.

Ég fór í afmæli til ömmu í Móholti í dag, það var rosa gaman, ég hitti Jóhönnu og Elvu en þær eru búnar að vera lasnar svo að ég hef ekki hitt þær heil lengi. Heiðdís og Bylgja voru líka hjá ömmu og það er nú alltaf gaman að leika soldið við stóru stelpurnar :)

Mamma var í skólanum eftir hádegi í dag og þar sem pabbi var að byrja í fæðingarorlofi vorum við bara heima í rólegheitunum, svo þurfti hann reyndar að fara að vinna smá en ég fór bara með. Það var mín fyrsta ferð til Bolungarvíkur og ég svaf hana af mér. En við þurfum nú reyndar að fara aftur til Bolungarvíkur bráðum að heimsækja Illu langömmu.

Mamma drattaðist loksins í Bónus í dag að kaupa ódýru bleyjurnar, þá var einmitt eiginlega bara eftir mín stærð! Heppilegt!

Við pabbi verðum svo aftur heima í fyrramálið þegar mamma fer í skólann. Núna er ég farin að hafa smá skoðanir á því hver á að vera með mér. Ég er ekkert sár þegar mamma fer en þegar hún kemur aftur til baka þá sýni ég það mjög ákveðið að ég vill að hún haldi á mér. Ég vill reyndar aldrei neitt mjög lengi í einu svo að það tekur bara smá stund og svo vill ég fara aftur að leika mér.

Ég fékk að smakka vínber í kvöld og það var sko algjört æði.

Elsku amma: Til hamingju með afmælið

kv, Sigrún Aðalheiður

Viltu snuð?

2005-03-08T06:33:00.000-08:00

Ég fór í heimsókn til ömmu í Móholti í gærkvöldi, það var bara gaman, það er orðið svo langt síðan ég sá hana síðast. Hún var í Reykjavík og keypti bangsa sem ''dongar'' þegar hann dettur, ég var soldið hissa fyrst en svo var það rosa gaman.

Það er tvennt sem mér finnst skemmtilegast þessa dagana, það er að blása, mamma veit ekki hvernig mér datt það í hug, líklegt finnst henni samt að það sé vegna þess að hún og pabbi flauta oft fyrir mig, eða þá að hún blæs á matinn ef hann er heitur áður en ég fæ að borða. Það er engin leið að vita afhverju ég er alltaf að blása. Hitt sem ég er alltaf að gera núna er að gefa öðrum snuðið mitt, það er sko svakalega fyndið!

Mamma og pabbi pöntuðu stól fyrir mig til að sitja í við matarborðið og hann kom loksins í dag, mamma baslaði heillengi við að koma honum saman, gafst svo upp og fór út í göngutúr með Greipi og mér. Þegar við komum heim þá bara small stóllinn saman eins og ekkert væri! Svo að núna fæ ég að borða kvöldmatinn minn í fínum stól! Það koma svo myndir af því fljótlega.

kv, Sigrún Aðalheiður

Ís, ís, ís og nýjar myndir

2005-03-06T03:34:00.000-08:00

Ég og mamma fórum í göngutúr á föstudagsmorguninn og komum við hjá langömmu og langafa í Miðtúni, ég ætlaði sko ekki að sofa það af mér og vaknaði í miðjum útiblundi til að kíkja á þau! Svo var ég í pössun hjá ömmu og afa í Fjarðarstræti um kvöldið af því að pabbi var að vesenast í bílskúrnum og mamma fór á spilavist.
Í gær vaknaði ég snemma og dreif foreldra mína á fætur, þau voru eitthvað lítið hress en ég var hin kátasta. Ég er búin að vera með vesen undanfarna daga og hef ekki viljað sofa mikið, sérstaklega ekki yfir daginn svo að mamma þarf eiginlega að labba með mig allan lúrinn, því að ég vakna alltaf þegar hún stoppar. Já fín líkamsrækt fyrir mömmu!
Í gærkvöldi komu amma og afi í Fjarðarstræti og Bæring frændi í heimsókn til okkar, þau komu með ís og ég fékk að smakka, mér finnst það alveg ÆÐISLEGA gott! Svo lék ég mér lengi frameftir eftir að þau voru farin, datt í dótakassann og ýmislegt. Mamma og pabbi tóku fullt af myndum sem eru komnar inn á myndasíðuna.
Það var svo mikið basl á mér í gær að ég var alveg rosalega þreytt og svaf bara alveg til 10 í morgun án þess að rumska í alla nótt.

en jæja, það eru komnar nýjar myndir.

kv, Sigrún Aðalheiður

Komnar nýjar myndir

2005-03-04T06:02:00.000-08:00

Það eru komnar nokkrar nýjar myndir af mér á myndasíðuna

kv, Sigrún Aðalheiður

Ný frænka

2005-03-03T08:41:00.000-08:00

Ég var að eignast nýja frænku í gær! Hún er dóttir Ægis og Þórdísar, ég á enn eftir að sjá mynd af henni en hún er örugglega svakalega mikið krútt. Mamma er búin að bæta henni á smábarnalistann hérna við hliðina.

Við mamma og Greipur fórum í heimsókn til Messíar, gamla harmónikkukennaranns þeirra, þ.e. mömmu og Greips, það var bara gaman, við skoðuðum harmónikkusafnið hans Ásgeirs, eða hluta af því, hann er nefnilega bara með u.þ.b. 50 harmónikkur heima en restin er úti í bílskúr, allt í allt á hann um það bil 100 harmónikkur! Það var bara gaman í heimsókninni, við þurfum endilega að gera þetta oftar!

Nýja frænka: Innilega til lukku með lífið

kv, Sigrún Aðalheiður

Fréttir helgarinnar

2005-02-28T12:53:00.000-08:00

Ég var í pössun á Hafrafelli í morgun, það var bara gaman eins og alltaf en núna svaf ég eiginlega allan tímann! Ég fékk nefnilega að fara út að sofa í kerrunni hennar Jóhönnu, það var alveg rosalega notalegt. Svo fór ég í göngutúr með mömmu og Greipi og kíkti svo í heimsókn til Greips þegar við vorum búin, svakalega erum við dugleg!

Ég fékk að smakka banana í fyrradag, það var sko GOTT!

Í gær voru Bæring frændi og vinir hans í heimsókn hjá okkur og það var svakalega gaman, þeir voru með fíflalæti og ég hló, svo voru þeir líka að leika leikrit fyrir mig. Svo um kvöldið fóru mamma og pabbi að sjá menntaskólaleikritið þar sem Djöflaeyjan rís og ég var í pössun hjá Halldóru ömmu á meðan, ég var bara stillt eins og venjulega en var orðin soldið þreytt undir lokin. Svo pissaði ég líka í sófann hennar...

Kristín frænka hringdi frá Þýskalandi í dag til að kvarta við mömmu yfir að nýjustu myndirnar á síðunni væru orðnar 3 daga gamlar...
...ég held að sumir séu orðnir full góðu vanir! En komnar nokkrar nýjar myndir.

kv, Sigrún Aðalheiður

1 - 0

2005-02-25T11:06:00.000-08:00

Eitt - núll fyrir mömmu! Ég er farin að drekka aftur ;) Mikið svakalega fannst mér þetta gott þegar ég loksins lét mig hafa það!
Ég fór í vigtun í gær útaf þessu veseni á mér og var búin að léttast um 100g síðan á síðasta föstudag, það er voðalega vont fyrir svona kríli eins og mig sem á að vera að stækka rosalega mikið, en núna er þetta vonandi allt á uppleið þar sem ég er farin að borða aftur :)

Ég er farin að bakka rosalega mikið, áðan lá ég á gólfinu og var að leika mér og mamma var eitthvað að bardúsa, svo þegar hún kíkti á mig var ég búin að bakka alveg úr stofunni og fram á gang! Hann pabbi þarf nú bara að fara að smíða hlið fyrir stigaopið svo mamma geti fengið harmónikkuna sína aftur, en hún hefur hingað til gengt því hlutverki að loka stiganum fyrir mér.

Það eru komnar nýjar myndir.

kv, Sigrún Aðalheiður

mamma aðeins of fljót á sér...

2005-02-23T00:22:00.000-08:00

Hún mamma var nú aðeins of fljót á sér í gær! Ég er sko alveg þversum ennþá! Drekk þangað til ég er ekki lengur þyrst og læt hana svo heyra það.

kv, Sigrún Aðalheiður

Mamma er að hafa það...

2005-02-22T03:28:00.000-08:00

Við mamma erum búnar að vera að berjast, ég vill ekki drekka en hún vill að ég drekki... Hún mamma er alveg að hafa þetta í gegn... Svona eru þessar mömmur, aldrei má maður ekki neitt.

kv, Sigrún Aðalheiður

Brjóstaverkfall

2005-02-21T07:56:00.000-08:00

Ég er enn í verkfalli, er búin að fá mér tvisvar smá sopa í dag, alltaf endað í hávaða og látum... mamma vonar að þessu fari nú að linna. Annars er ég bara kát á meðan mamma reynir ekki að leggja mig á brjóstið og er núna sofandi úti í vagni. Snotra, hundurinn hennar Kristínar frænku er í pössun hjá okkur því að amma og afi í Fjarðarstræti eru í Reykjavík, það verður nú spennandi þegar ég vakna að kíkja aðeins á hana, ég er nefnilega svolítið spennt í að rífa í hana...

Það hafa kannski einhverjir tekið eftir því að núna er hægt að finna síðuna mína líka á Barnaland.is undir nafninu mínu, en hún verður auðvitað líka áfram hér á www.stelpukrili.blogspot.com

kv, Sigrún Aðalheiður

Í pössun hjá ömmu

2005-02-20T17:43:00.000-08:00

Ég var í pössun hjá ömmu í Móholti meðan mamma og pabbi fóru á þorrablót í gær. Það var rosa gaman, ég var bara stillt og fékk að gista hjá ömmu, ég fékk bæði graut og mjólk úr pela og var bara dugleg, en svo þegar mamma og pabbi komu að sækja mig í dag þá nennti ég ekki að drekka úr brjóstinu, það er svo auðvelt að drekka úr pelanum, mjólkin kemur alveg strax og ekkert vesen eins og með brjóstið en mamma ætlar sko ekki að láta mig komast upp með þessa leti. Bylgja frænka var líka hjá ömmu og ég var heilmikið að leika við hana, voða gaman. Úlli frændi hennar Jóhönnu kom við hjá ömmu og ég varð alveg logandi hrædd við hann! Mamma skilur það nú ekki því að ég hef oft hitt Úlla á Hafrafelli! Svo var ég reyndar líka eitthvað skúffuð við Barða pabba hennar Jóhönnu þannig að mamma heldur að ég hafi kannski bara verið soldið móðguð við hana og pabba að skilja mig eftir svona lengi... Hver veit.

kv, Sigrún Aðalheiður

5 mánaða

2005-02-18T14:29:00.000-08:00

hæ, ég er orðin fimm mánaða, varð það reyndar á mánudaginn en vegna þess að ég var soldið slöpp ennþá um helgina þá ákvað mamma að ég færi ekki í skoðunina fyrr en í dag, vegna þess að það var sprauta. Ég var rosa dugleg í sprautunni, grét ekki neitt og varð ekkert reið í þetta sinn! Ég var mæld og vigtuð og er orðin 5990 gr og 63 cm aldeilis orðin stór stelpa! Ég pissaði á mömmu í skoðuninni, það var bara svo gott að vera svona berrössuð en mamma þurfti að labba heim í blautum sokkum í kuldanum... aumingja mamma. Það er víst rétt að setja herna niður aðeins hvað ég get þessa dagana.
Ef mér er rétt hönd og sagt: komdu sæl. Þá rétti ég mína hönd á móti og ætlast til að það sé tekið í hana og sagt: komdu sæl og blessuð, þá verð ég rosalega glöð! Ég rúlla mér um öll gólf og er farin að reyna að setja hnén undir mig, þegar mér tekst það þá gleymi ég að lyfta mér upp að framan. Ég er farin að æfa mig að sitja sjálf en dett yfirleitt á hliðina eða andlitið eftir smá stund, er samt alltaf að verða stöðugri og stöðugri með hverjum deginum.
Mamma segir að ég sé handóð, ef eitthvað er innan seilingar þá æsist ég öll upp og VERÐ að taka það og setja það auðvitað beint í munninn! Stundum ef hlutir eru rétt utan seilingar þá teygi ég hendurnar í áttina til þeirra og öskra soldið á þá, þeir koma samt ekki en það má alltaf reyna, er það ekki?
Ég er mjög óþolinmóð, þegar mamma er að gefa mér grautinn þá græt ég meðan hún fyllir skeiðina, hún ætti kannski bara að fá sér tvær skeiðar og mata mig svoleiðis?

Að lokum vill ég minna alla á að skrifa í gestabókina mína

kv, Sigrún Aðalheiður

Snjór, snjór, snjór

2005-02-16T20:51:00.000-08:00

Nú hefur aldeilis sjóað á okkur, ég snjóaði næstum í kaf í vagninum mínum fyrir utan heima í dag! Mamma tók mynd og hún kemur á síðuna bráðum. Annars fór ég í afmæli í gær, Henry afi var að verða fjörutíuogeitthvað svo fór ég aftur í afmæli í dag til Bærings langafa hann var að verða 81. Það snjóaði svo rosalega mikið að langafi þurfti að moka bílastæðið og tröppurnar hjá sér þrisvar sinnum í dag!

Afi og langafi: til hamingju með afmælin

kv, Sigrún Aðalheiður

heilsufarið á fjölskyldunni

2005-02-13T13:56:00.000-08:00

Jæja fjölskyldan er öll að hressast, mamma ætlar í skólann sinn á morgun og pabbi í vinnuna svo ég fer á Hafrafell, það verður nú gaman að hitta Elvu og Jóhönnu aftur, það er svo langt síðan ég var hjá þeim síðast! Annars vorum við í mat hjá ömmu og afa í Fjarðarstræti í kvöld, spiluðum bingó og unnum ekki neitt. Kristín frænka er núna í Þýskalandi en hún sendi mér kjól sem hún prjónaði, núna er mamma búin að leyfa mér að prófa hann og myndin er komin á myndasíðuna, takk æðislega fyrir kjólinn frænka, hann er rosa flottur, og húfan líka :)

kv, Sigrún Aðalheiður

flensan, flensan og nýjar myndir

2005-02-09T19:58:00.000-08:00

Ég er nú alveg að verða hress en mamma og pabbi eru eins og hræ... ekki skemmtilegt það. Mér þykir voðalega leiðinlegt að geta ekki farið út að sofa í vagninum mínum og svo heyrast allskonar undarleg hljóð í mömmu minni og pabba, svona hóst, hóst, snýt, snýt og mér bregður alltaf jafn mikið! Annars heyrðust nú bara engin hljóð í mömmu í morgun, hún varð að skrifa pabba sms til að biðja hann að hringja á sjúkrahúsið að panta tíma fyrir mig í ungbarnaeftirlitið! Þetta var annars voðalega fyndið, mamma fór á fætur með mig og við fórum fram í stofu að leika og mamma sagði auðvitað ekki neitt, vegna þess að hún kom ekki upp hljóði og þá sagði ég bara ekkert heldur, lék mér bara í þögn þangað til pabbi kom og talaði við mig þá fyrst fór ég að æpa og skrækja eins og ég er vön.
Það eru komnar nokkrar nyjar myndir.

kv, Sigrún Aðalheiður

Flensan...

2005-02-07T22:54:00.000-08:00

Nú liggjum við öll fjölskyldan í flensu :( Fyrst veiktist pabbi, svo ég og síðast mamma, ég og mamma erum samt aðeins að hressast núna en pabbi er alveg utan þjónustusvæðis ennþá. Jóna amma var búin að sauma á mig fínan grímubúning sem ég gat svo bara ekkert notað, ég smelli mér nú samt í hann þegar ég er orðin hress þó ekki væri nema bara til að taka myndog setja á síðuna. Mamma og pabbi voru svo hrikalega lasin í dag að ég fór aðeins í heimsókn til ömmu og afa í Fjarðarstræti svo þau gætu lagt sig. Mamma heldur að við höfum öll haft gott af því :)

kv, Sigrún Aðalheiður

Sól, sól skín á mig

2005-02-03T07:42:00.000-08:00

Loksins kom sólin! Í dag er fyrsti dagurinn sem sólin nær að skína á húsið okkar, hún hefði örugglega skinið fyrir nokkrum dögum en þá var bara alltaf skýjað! Ég fór út að sofa í sólinni.
Annars er ég búin að vera í pössun á Hafrafelli núna 3 morgna í þessari viku, svaka gaman, við Jóhanna erum mikið að skoða hvor aðra. Í dag var hún meira að segja að hrekkja mig! Ég fattaði það nú ekki alveg samt, hún rétti mér dót og svo þegar ég teygði mig eftir því þá kippti hún því í burtu og fannst þetta voða sniðugt! Svona getur verið að vera yngri... en ég á nú örugglega eftir að ná mér á strik þótt síðar verði!

kv, Sigrún Aðalheiður

Sundmyndirnar komnar

2005-02-02T01:24:00.000-08:00

Jæja, þá eru sundmyndirnar komnar inn. Mamma var í vandræðum með að setja þær inn því þær vistuðust alltaf vitlaust en mamma hennar Hrefnu Dísar reddaði þessu alveg. Páll Janus, pabbi hennar Hrefnu Dísar tók myndirnar fyrir okkur þegar við vorum í sundi.

kv, Sigrún Aðalheiður

loksins nýjar myndir

2005-01-29T01:53:00.000-08:00

tölvan er komin úr viðgerð og allt orðið eins og það á að vera svo nú eru komnar myndir af punktunum og leikfimiæfinunum og ýmsu öðru.

kv, Sigrún Aðalheiður

Besta rassakrem í heimi!

2005-01-29T00:22:00.000-08:00

Ég á besta rassakrem í heimi. Það heitir Barnakrem og er úr jurtum stendur á dollunni, það er framleitt af Urtasmiðjunni á Svalbarðsströnd og mamma keypti það í blómabúðinni sem er hætt. Kremið hefur alltaf virkað vel en núna væri það sko komið í guðatölu ef það væri persóna! Mamma tók nefnilega eftir að ég var ekki með nein ofnæmisútbrot á rassinum og Henry afa datt í hug að það gæti verið eitthvað efni í bleyjunni eða rassakreminu sem væri svona gott, mamma ákvað að það gæti ekki versnað svo að hún bar rassakremið á allan kroppinn minn og viti menn! útbrotin voru öll farin á innan við 12 tímum!
Við mamma mælum sko pottþétt með þessu kremi!

Til hamingju með afmælið Verena frænka í Þýskalandi

kv, Sigrún Aðalheiður

Nú er það ljótt!

2005-01-28T17:34:00.000-08:00

Eins og þið vissuð fór ég í fyrsta sundtímann á þriðjudaginn og fannst alveg æðislega gaman svo þegar við vorum að fara uppúr tók mamma eftir að ég var með einhverja litla rauða punkta á bakinu, spáði ekki meira í það. Svo um kvöldið var ég öll út steypt í punktum! Mamma fór með mig til læknis á miðvikudeginum og hann sagði að þetta væri að öllum líkindum klórofnæmi og við ættum að hætta að fara í sund, prófa kannski aftur eftir 3 mánuði og sjá hvort þetta gerist aftur þá, því að stundum eldist svona víst af krílum eins og mér. Svo að við mamma fáum ekkert að fara í sund! mömmu finnst það alveg hrikalega leiðinlegt, en við gerum bara eitthvað annað skemmtilegt í staðin.
Mamma ætlar svo að reyna að setja inn myndir í kvöld eða á morgun, það er orðið ansi langt síðan síðast.

Elsku Kristín frænka, til hamingju með afmælið þann 26. tölvan var í viðgerð svo að við gátum ekki skrifað þá.

kv, Sigrún Aðalheiður

Sundgarpurinn

2005-01-25T19:17:00.000-08:00

Pössunin gekk bara vel á Hafrafelli í gær. Það var rosa mikið rok, mamma fór í Bónus og keypti m.a. klósettpappír sem fauk út í hafsauga áður en hún náði að koma honum í bílinn! Í gærkvöldið prófaði ég nýja sundbolinn minn í baðkarinu heima, hann er soldið stór en dugir alveg. Í dag fór ég svo í fyrsta sundtímann, það var rosalega gaman og ég var svo þreytt þegar ég var búin að ég sofnaði á leiðinni heim og mamma vakti mig svo klukkan rúmlega fimm til að ég myndi borða eitthvað áður en hún þyrfti að fara á lúðrasveitaræfingu, ég var í pössun hjá ömmu og afa í Fjarðarstræti á meðan. Tölvan hennar mömmu er biluð og er í viðgerð svo að núna er hún að skrifa þetta heima hjá ömmu og afa, þess vegna getur hún ekki sett inn myndir í dag en pabbi hennar Hrefnu Dísar ætlar að senda okkur einhverjar sundmyndir frá því í dag, þær koma svo inn á myndasíðuna við fyrsta tækifæri.

kv, Sigrún Aðalheiður

ýmsar fréttir af mér

2005-01-23T22:18:00.000-08:00

Við mamma fórum heldur betur í göngutúr í gær! Löbbuðum inn í Móholt til ömmu, það var soldið ófært fyrir vagninn frá Grænagarði að Seljalandi en súper mamman og súperstelpan höfðu það, svo ekki sé nú talað um súper vagninn, þetta er eiginlega jeppi!
Við fórum svo í mat til ömmu og afa í Fjarðarstræti, mamma og pabbi fengu kjúkling en ég fékk sko graut með gulrótamauki útí, það var ÆÐISLEGA GOTT!!! Ég fékk svo að gista hjá afa og ömmu og kom ekki heim fyrr en undir hádegi í dag.
Svo í dag komu nágrannar okkar í heimsókn, Erik, Lísbet og Sara hún á síðu á barnalandi, þið getið skoðað hana ef þið klikkið á nafnið hennar.
Við fórum í heimsókn til ömmu í Móholti í dag, keyrandi í þetta skiptið! Elva og Jóhanna voru þar líka í heimsókn og við Jóhanna spjölluðum svolítið saman, hún var eiginlega bara hrædd við mig en jafnaði sig fljótt og stal duddunni minni.
Á morgun fer ég svo í pössun á Hafrafell meðan mamma er í skólanum.

kv, Sigrún Aðalheiður

Rúllandi, rúllandi, rúllandi, rúllandi...

2005-01-22T00:29:00.000-08:00

Núna er ég farin að velta mér bæði af maganum á bakið og af bakinu á magann svo að núna rúlla ég um allt, áðan rúllaði ég undir sófa og sat þar föst, mamma tók mynd og setti á myndasíðuna. Annars er ég búin að vera óþekk að fara að sofa undanfarnar tvær nætur, það er eitthvað að angra mig sem mamma og pabbi fatta ekki hvað er, kannski mallinn, kannski tennur eða bara hreinræktaður pirringur, engin leið að vita.
Heiða frænka og Íris eru að fara aftur heim til sín til Reykjavíkur á morgun, þær komu í smá heimsókn í kvöld að kíkja á mig áður en þær fara, Heiða var nú bara að hugsa um að taka mig með, setti mig bara ofan í tösku!
Mér er boðið í afmæli á morgun til hennar Kötlu Maríu, ég veit ekki ennþá hvort við komumst en við ætlum að reyna það, mamma og pabbi eru eitthvað upptekin á morgun...

kv, Sigrún Aðalheiður

Kisuævintýri

2005-01-18T11:54:00.000-08:00

Hvað haldið þið að hafi gerst í gærkvöldi? Ég lá á teppi á gólfinu og var að leika mér með dótið mitt og mamma sat í stofusófanum og horfði á sjónvarpið með annað augað á mér en svo var eitthvað spennandi í sjónvarpinu eða eitthvað svo hún leit ekki á mig í smá stund. Mamma heyrði svo eitthvað skrýtið hljóð og leit á mig þá hélt ég í skottið á KETTI!!! Við eigum ekki einu sinni kött! Þegar mamma stóð upp til að taka mig þá hljóp kötturinn niður í kjallara og síðan hefur ekkert spurst til hans. Mömmu dauðbá auðvitað en ég var ekkert að kippa mér upp við þetta. Mamma og pabbi eru búin að vera í smá kisuvandræðum síðan við fluttum í nýja húsið því að það er einhver köttur sem pissar alltaf á þvottahúsgluggann, þetta er kannski sá sami? Okkur er allavega ekki vel við að annara manna gæludýr komi óboðin í heimsókn svo passið upp á kettina ykkar!

Elsku Jóna amma: Til hamingju með afmælið!

kv, Sigrún Aðalheiður

Alheimsins grautur sá þykki, sá þunni

2005-01-17T21:34:00.000-08:00

Alheimsins grautur sá þykki, sá þunni,
þyrfti að komast frá diski að munni.
Starfinu flýtir, svo stutt verður leiðin,
hin stórvirka og hraðvirka mokstursvél:
skeiðin

muna ekki allir eftir Gleymmérey?

Ég var að fá fyrsta grautinn í gær! Mér fannst hann æðislega góður og var bara alls ekki sátt þegar það var búið úr skálinni, svo fékk ég aftur í kvöld og fór að orga þegar það var búið mamma gaf mér þá soldið að drekka og ég jafnaði mig fljótt, ég á bara aðeins eftir að læra á þetta en ég er voðalega dugleg :)
Ég fór líka í afmæli í gær, Íris frænka var að verða 12 ára. Hún er nú aldeilis orðin stór hún frænka mín!

kv, Sigrún Aðalheiður

Myndir, myndir, myndir

2005-01-17T13:36:00.000-08:00

Mamma setti fullt af myndum á myndasíðuna, frá erfidrykkjunni, fyrsta grautnum, afmælinu og svo nokkarar í viðbót, endilega kíkja og svo hefur heldur enginn skrifað í gestabókina síðan 2. janúar!

kv Sigrún Aðalheiður

Frænkur og frændur

2005-01-17T10:33:00.000-08:00

Jæja pössunin gekk vel hjá Andreu frænku, ég svaf bara næstum allan tímann! Svo komu mamma og pabbi að sækja mig þegar þau komu úr kirkjugarðinum og við fórum öll í erfidrykkjuna hans afa og þar hitti ég ógrynni af frænkum og frændum, suma hef ég hitt áður en flesta var ég að sjá í fyrsta skipti, það var mjög gaman að hitta alla. Svo voru teknar myndir af fjölskyldunni, mamma ætlar að reyna að setja þær inn á eftir, forritið til að setja inn myndir er eitthvað klikkað.
Núna eru Halldóra amma og Heiða frænka að passa mig inni í Móholti meðan mamma er í skólanum.

kv, Sigrún Aðalheiður

4 mánaða stelpuskott

2005-01-15T12:40:00.000-08:00

Ég er orðin 4 mánaða! Svakalega líður tíminn hratt! Ég fór í aukaskoðun í gær og er orðin 5440g og 61cm, mamma hélt að ég væri kannski ekki að þyngjast nóg en svo var það bara móðursýki í henni eins og svo oft áður! Ég er orðin svakalega dugleg, kann að vera ''aaaa...'' við mömmu og pabba, geri það óspart og finnst það æðislega gaman.
Núna á eftir er ég að fara í pössun til Andreu frænku minnar vegna þess að mamma og pabbi eru að fara í jarðarförina hans Jóhanns afa.

kv, Sigrún Aðalheiður

Elsku afi minn

2005-01-10T08:48:00.000-08:00

Afi minn, Jóhann Magnússon, pabbi hans pabba dó á síðasta föstudag. Hann var búinn að vera mikið veikur en líður núna örugglega betur. Við erum alveg viss um að hann fylgist með afastelpunni sinni og gleðst yfir hvað ég er dugleg :)
Elsku afi, við söknum þín öll svakalega mikið.

kv, Sigrún Aðalheiður

Breytingar á síðunni

2005-01-10T08:42:00.000-08:00

Eins og þið sjáið þá hafa verið gerðar þó nokkrar breytingar á síðunni minni yfir jólin. Aðallega eru þetta letur og útlitsbreytingar en einnig hefur verið bætt við linknum sem heitir staðreyndir og er undir ég hérna til hægri á síðunni. Þarna setur mamma inn hvað ég er stór og þung og svona það helsta sem ég læri, þetta setur hún inn jafnóðum með dagsetningum og hvað ég er gömul. Þarna er sem sagt hægt að fylgjast með því helsta sem ég er að læra.

kv, Sigrún Aðalheiður

Stór áfangi!

2005-01-10T08:33:00.000-08:00

Hvað haldið þið að ég hafi gert?!? Ég bara velti mér af bakinu yfir á magann! Þetta var á síðasta föstudag (7. jan) svakalega dugleg! Mamma og pabbi eru rosalega ánægð með mig. Núna geri ég ekkert annað. Jafnvel þó að mér hundleiðist að liggja á maganum sný ég mér alltaf beint þangað. Ég virðist líka bara geta kunnað eitt í einu því að eftir að ég lærði að velta mér af bakinu yfir á magann þá er ég hætt að velta mér af maganum á bakið og ligg bara eins og selur þangað til einhver kemur og bjargar mér...

kv, Sigrún Aðalheiður

Hring eftir hring eftir hring eftir hring...

2005-01-06T17:33:00.000-08:00

Það er frekar lítið að frétta af mér núna, ég bara snýst og snýst í rúminu, hvort sem ég vaki eða sef og er núna farin að fara mjög hratt, liggjandi á bakinu get alveg snúið mér í 360 gráður á 10-15 mínútum. Stundum festist ég og þá er ég ekkert kát...
Helga frænka mín segir samt að ég sé fædd jákvæð vegna þess að ég fer ekki endilega að grenja ef eitthvað bjátar á en ég verð óskaplega glöð þegar það lagast :)

Kristín frænka er búin að vera að passa mig tvo síðustu morgna og kemur aftur á morgun, mamma er nefnilega búin að vera að leysa af í Grunnskólanum síðan hann byrjaði, svo byrjar skólinn hennar mömmu í næstu viku, Kristín frænka er þá bráðum að fara til útlanda þannig að ég þarf bara líklegast að fara með mömmu í skólann... það gæti nú verið erfiðara núna heldur en það var í haust þar sem ég er farin að vaka miklu meira og vilja láta leika við mig... Við sjáum bara til hvernig það fer.

Annars ætlum við mamma og pabbi að fara að kíkja til Jóhanns afa í kvöld, hann er aftur kominn á sjúkrahúsið og honum finnst voða gaman að fá afastelpuna sína heimsókn :)

kv, Sigrún Aðalheiður

Áramót

2005-01-02T15:23:00.000-08:00

Gleðilegt nýtt ár!

Ég, mamma og pabbi borðuðum hjá ömmu og afa í Móholti á gamlársdag svo fór pabbi að vesenast í flugeldasýninunni sem var frestað en ég og mamma kíktum á ömmu og afa í Fjarðarstræti á meðan og borðuðum aftur þar :) Við vorum svo komin inneftir aftur áður en skaupið byrjaði og horfðum á það, þarna var ég reyndar sofnuð og rumskaði ekki einu sinni við lætin klukkan 12, heldur svaf bara á mínu græna eyra alveg til svona 1 en þá voru Jóna amma, Henry afi og Bæring frændi líka komin inn í Móholt til ömmu og afa þar. Ég vaknaði aðeins til að kíkja á fólkið en fór svo bara að sofa aftur og vaknaði ekki fyrr en um hádegi! Það getur verið erfitt að vera svona lítil eins og ég!

kv, Sigrún Aðalheiður

Jólaböll

2004-12-30T23:03:00.000-08:00

Ég er búin að fara á tvö jólaböll eitt frímúraraball með Elvu, Jóhönnu, Írisi og Heiðdísi, það var í fyrradag og voða gaman, það komu jólasveinar og allt en ég er nú full lítil til að skilja allt þetta. Í gær fór ég svo á oddfellowjólaball, það var líka rosa gaman en við mamma þurftum að fara áður en jólasveinarnir komu vegna þess að mamma þurfti að fara í skólann sinn. Ég fór í pössun til Jónu ömmu, mamma setur inn nokkrar myndir úr pössuninni.
Núna er ég farin að ''tala'' heilmikið þetta er mest svona rámt hvísl en mér finnst það kjög skemmtilegt ég er líka farin að naga á mér tærnar og ver alveg öskuill þegar mamma tekur þær og setur í sokka eða sokkabuxur!

Elva, Barði, Áslaug, Davíð og Jóhanna voru í mat hjá okkur í kvöld, það var bara fínt, þau borðuðu hangikjöt, Jóhanna fékk graut en ég fékk auðvitað ekki neitt frekar en venjulega.

kv, Sigrún Aðalheiður

Jólin jólin!!!

2004-12-25T18:10:00.000-08:00

Gleðileg jól allir sem heimsækja síðuna mína :) Ég þakka kærlega fyrir mig.

Vegna þess að ég má ekkert borða þá fékk ég alveg HAF af pökkum!! Ég fékk pakka frá næstum öllum sem ég þekki og marga frá sumum! Fullt af leikföngum og fötum. Ég var nú samt hálf stúrin í gærkvöldi, lítið búin að leggja mig allan daginn. En svo lagði ég mig aðeins þegar mamma og pabbi, afi og amma, Heiða og Íris voru að opna pakkana og var þá hin hressasta þegar Elva, Barði, Áslaug, Davíð, Jóhanna, Helga, Magnús, Bylgja og Heiðdís komu til ömmu og afa :)

Svo er búið að vera rosa gaman í dag, mamma bjó til tertu og amma og afi í Fjarðarstræti komu í heimsókn en annars eru bara rólegheit hjá litlu fjölskyldunni í dag :) Við ætlum að kíkja til ömmu og afa i Móholti aftur í kvöld og halda svo áfram í rólegheitunum.

Við ætlum svo að njóta þess að vera í fríi næstu viku því þetta er síðasta vikan hans pabba í fæðingarorlofi í bili en hann er búinn að vera í fríi síðan 10. des. Hann er búinn að vera rosalega duglegur að parketleggja, mála og stússast ýmislegt hérna heima.

Ég segi bara aftur, gleðileg jól og takk fyrir mig :)

kv, Sigrún Aðalheiður

Jólin eru að koma!

2004-12-21T20:41:00.000-08:00

Mamma segir að jólin séu alveg bráðum að koma, ég veit ekkert hvað þetta jól er en mamma hlakkar mikið til þeirra. Ég og mamma og pabbi ætlum að vera í Móholti hjá ömmu og afa á aðfangadagskvöld, Heiða föðursystir og Íris dóttir hennar verða líka þar. Annars er pabbi að smíða vegg og parketleggja hjá okkur núna og við mamma bara að stússast í bakstri, tiltekt og öðru tilfallandi.

Mamma fór í klippingu í dag og lét klippa sig alveg stutt og mér finnst voða skrýtið að sjá einhverja konu með röddina hennar mömmu og lyktina! Það er samt voða fyndið og ég er búin að glotta og hlæja mikið í kvöld.

kv, Sigrún Aðalheiður

Ömmur og afar

2004-12-20T12:39:00.000-08:00

Mamma er að reyna að safna myndum af mér með ömmunum mínum og öfum, ég er nefnilega svolítið rík, ég á alveg fullt af þeim, það eru:

Amma og afi í Fjarðarstræti - þau heita Jóna og Henry og eru foreldrar mömmu
Amma of afi í Móholti - þau heita Halldóra og Jóhann og eru foreldrar pabba
Amma og afi í Miðtúni - þau heita Bæring og Guðrún og eru foreldrar Henrys afa
Amma í Bolungarvík - hún heitir Illa og er mamma Halldóru ömmu
Afi ''skrafi'' á Grenivík/ í Reykjavík - hann heitir Benedikt og er pabbi Jónu ömmu
Ég á líka eina ''stjúpid'' langömmu - hún heitir Fimba og er konan hans afa skrafa

Við eigum mynd af mér með Jónu og Henry og með Bæring og Guðrúnu en myndirnar af mér með Jóhanni og Halldóru eru í myndavélinni. Það á eftir að taka mynd af mér með Illu ömmu. Afa skrafa og Fimbu hef ég aldrei hitt, vegna þess að þau eiga heima svo langt í burtu.

kv, Sigrún Aðalheiður

Alltaf í pössun

2004-12-18T14:33:00.000-08:00

Pössunin gekk vel hjá Áslaugu frænku í gær, ég var bara voða stillt hjá henni :) Mamma og pabbi voru í burtu í 5 klukkutíma!
Ég svaf í alla nótt í rúminu mínu nýja og vaknaði alveg þversum en það var allt í lagi því það er svo mikið pláss :)

Annars fer ég aftur í pössun í kvöld, endalaust útstáelsi á þessum foreldrum sem ég á! Nú ætla ég að vera hjá Jónu ömmu og Henry afa í Fjarðarstræti.

kv, Sigrún Aðalheiður

Nýja rúmið

2004-12-17T15:32:00.000-08:00

Jæja, þá er mamma búin í prófunum svo nú getur jólaundirbúningurinn hafist fyrir alvöru heima hjá mér :)
Mamma og pabbi eru reyndar að fara í lokahóf úti í Bolungarvík í kvöld og Áslaug frænka ætlar að passa mig á meðan. Læt ykkur vita a morgun hvernig það gengur :)

Nýja rúmið mitt kom í morgun og pabbi skrúfaði það saman meðan mamma var í síðasta prófinu. Svo núna hef ég nóg pláss til að hringsnúast og gera hvað sem ég vill meðan ég sef :)

kv, Sigrún Aðalheiður

meira um myndir

2004-12-15T16:28:00.000-08:00

Mamma og pabbi tóku jólakortamyndina af mér í dag, hún er rosa flott en þau ætla ekki að setja hana inn á síðuna fyrr en eftir 24. des til að skemma ekki fyrir þeim sem opna ekki jólakortin fyrr en á aðfangadag.
Varðandi myndaseríuna af mér í vöggunni þá eru mamma og pabbi búin að panta fyrir mig rúm sem er 120x60 :)

kv, Sigrún Aðalheiður

Myndaseria

2004-12-14T14:53:00.000-08:00

Mamma setti smá myndaseriu inn á myndasíðuna.

kv, Sigrún Aðalheiður

Það er allt á floti alstaðar...

2004-12-13T21:00:00.000-08:00

Við mamma vöknuðum við símhringingu í morgun. Það var hún Kristín Þóris (mamma Eriks á efri hæðinni) hún var að passa Söru (sem býr uppi) og varð litið niður í kjallara og þar var ALLT Á FLOTI! Við mamma vöktum pabba og hann fór niður að skoða og vesenast, þau hringdu á slökkviliðið en þeir vildu ekki koma að dæla fyrr en það væri fallið frá, þannig að pabbi fór niður í Sindragötu og sótti dæluna sem Björgunarfélagið á og dældi upp úr kjallaranum bæði hjá okkur og Erik. Barði kom svo að hjálpa honum og afi Henry kíkti líka á okkur. Pabbi er búinn að vera í allan dag að hreinsa kjallarann og er enn að og nú er aftur háflóð klukkan hálf tíu í kvöld en núna erum við tilbúin :)
Verst er að þvottavélin lenti í vatninu, við vitum ekki ennþá hvort hún er ónýt og við mamma vonum svo sannarlega að hún sé það ekki!
Annars kom Edda María vinkona mömmu í heimsókn í dag til að skoða mig og í gær vorum við í mat hjá ömmu og afa í Fjarðarstræti, langamma og langafi voru líka í mat og mamma setti inn mynd af mér með þeim og líka með Eddu.

kv, Sigrún Aðalheiður

Tvær myndir

2004-12-09T22:18:00.000-08:00

Mamma setti tvær nýjar myndir af mér á myndasíðuna

kv, Sigrún Aðalheiður